لوٹن : برطانیہ میں ایک خاتون جو اپنے تین ماہ کے بچے سمیت گزشتہ دو ہفتوں سے لاپتہ تھی بالآخر پولیس کو مل گئی۔
اس حوالے سے غیر ملکی خبر رساں ادارے کی رپورٹ کے مطابق لوٹن پولیس اپنے ہر ممکن اقدامات اور تحقیقات کے باوجود گمشدہ ماں بیٹے کی تلاش میں ناکام تھی۔
رپورٹ کے مطابق مذکورہ خاتون ’انکا‘ جس کا پورا نام پولیس نے ظاہر نہیں کیا ہے، وہ اور اس کا 3 ماہ کا بچہ 17 اکتوبر بروز جمعرات کو آخری مرتبہ صبح 11بجے لوٹن کے علاقے بیڈ فورڈ شائر کے ٹریول لاج ہوٹل سے نکلتے ہوئے دیکھے گئے تھے۔
تفتیشی افسران نے 29 سالہ ’انکا‘ اور اس کے بچے کی خیریت کے حوالے سے "شدید تحفظات کا اظہار کیا تھا جس کے بعد ان کی تلاش کے لیے باقاعدہ ایک ہنگامی مہم کا آغاز کیا گیا تھا۔
تازہ ترین اطلاعات کے مطابق اب لوٹن پولیس نے بتایا ہے کہ مذکورہ لاپتہ ماں اور اس کا 3ماہ کا بچہ دونوں محفوظ اور خیریت سے ہیں، تاہم ابھی پولیس نے اس حوالے سے تفصیلات جاری نہیں کی ہیں کہ مذکورہ ماں اور اس کا بچہ کس مقام اور کن حالات میں بازیاب ہوئے۔
