کوئٹہ : پولیس اہلکار کے نجی ٹارچر سیل سے 4 نوجوانوں کو بازیاب کرالیا گیا، مذکورہ نوجوانوں کو رقم حاصل کرنے کیلیے شدید تشدد کا نشانہ بنایا گیا۔
اے آر وائی نیوز کوئٹہ کے بیورو چیف مصطفیٰ خان ترین کی رپورٹ کے مطابق کوئٹہ کے بروری تھانے کی حدود میں پولیس اہلکار کے نجی ٹارچر سیل سے حبس بے جا میں رکھے گئے چار نوجوانوں کو بازیاب کرالیا گیا ہے۔
پولیس حکام کے مطابق کارروائی کے دوران نجی سیل میں موجود تین ملزمان کو گرفتار کرکے اسلحہ برآمد کرلیا ہے۔ جبکہ مرکزی ملزم ثناء اللہ کی گرفتاری کیلئے چھاپے مارے جارہے ہیں۔
ترجمان پولیس کے مطابق بازیاب ہونے والے نوجوانوں نے بتایا ہے کہ چوری کے جھوٹے کیس میں ثناءاللہ نامی پولیس اہلکار نے تھانے کے بجائے یہاں قید کر رکھا تھا۔
بازیاب نوجوانوں کے مطابق ملزمان جھوٹے کیس کا اعتراف کرانے اور پیسے لینے کیلئے تشدد کا نشانہ بھی بناتے رہے۔
