واشنگٹن : امریکی صدارتی انتخاب 2024 میں ٹرمپ سے شکست کا سامنا کرنے والی ڈیمو کریٹک امیدوار کملا ہیرس نے کہا ہے کہ ہماری جدوجہد جاری رہے گی۔
الیکشن میں شکست کے بعد ہاورڈ یونیورسٹی سے خطاب میں کملا ہیرس کا الیکشن مہم میں ساتھ دینے والوں کا شکریہ ادا کرتے ہوئے کہنا تھا کہ ہمیں الیکشن کے نتائج کھلے دل سے تسلیم کرنے چاہئیں۔
غیر ملکی خبر رساں ادارے کی رپورٹ کے مطابق امریکی انتخابات میں ڈونلڈ ٹرمپ سے ہارنے والی کملا ہیرس نے شکست قبول کرتے ہوئے کہا کہ الیکشن میں ہار مانتی ہوں، اقتدار کی پر امن منتقلی یقینی بنانےکیلئے پرعزم ہیں۔
امریکی صدارتی انتخاب 2024
ان کا کہنا تھا کہ ہم ہمت نہیں ہاریں گے، ہماری جدوجہد جاری رہے گی اور ہماری جدوجہد امریکا کے بہتر مستقبل کیلئے تھی۔
کاملاہیرس نے کہا کہ آئین اور قانون کی بالادستی کیلئے ہماری تحریک جاری رہے گی، جمہوریت کا یہی اصول ہے کہ اگر ہارو تو شکست بھی تسلیم کرو، جمہوریت اورآمریت میں یہی فرق ہے۔
امریکی نائب صدر نے بتایا کہ ہم نے انتخابی مہم میں تمام لوگوں کو متحد کرنے کی کوشش کی، ہمیں تاریکی میں چمکتے ہوئے ستاروں سے بھی امید کی کرن لینی ہے۔
کاملا ہیرس نے کہا کہ گن وائلنس سے اپنے شہریوں کو محفوظ رکھنے کیلیے کسی بھی جنگ میں ہار نہیں مانیں گے، ہماری لڑائی امریکا کے بہتر مستقبل کی لڑائی ہے۔
