ڈونلڈ ٹرمپ کو امریکی صدارتی انتخابات میں کامیابی کے بعد یوکرین کے صدر ولودومیر زلنسکی کی جانب سے مبارکباد پیش کی گئی اور اس اُمید کا اظہار کیا گیا کہ ان کے صدر بننے کے بعد یوکرین میں امن و امان بحال ہوجائے گا۔
بین الاقوامی خبر رساں ادارے کی رپورٹ کے مطابق یوکرین کے صدر ولودومیر زلنسکی کی جانب سے دونوں ممالک کے درمیان باہمی تعاون پر بھی زور دیا گیا ہے مگر یوکرین اس حوالے سے تشویش میں بھی مبتلا ہے۔
رپورٹس کے مطابق یوکرین کی پریشانی کی وجہ یہ ہے کہ ڈونلڈ ٹرمپ نے انتخابی مہم کے دوران کئی بار کہا تھا کہ وہ امریکہ کا پیسہ دوسرے ممالک کی بجائے اپنے عوام پر خرچ کرنے کے خواہش مند ہیں، جبکہ اس دوران ٹرمپ نے یوکرین کو دی جانے والی امریکی فوجی اور اقتصادی مدد پر اعتراضات بھی اٹھائے تھے۔
یوکرین کو روس کے خلاف جنگ میں بائیڈن انتظامیہ کی جانب سے بڑے پیمانے پر حمایت حاصل تھی اور امریکا کی جانب سے یوکرینی فوج کو اہم عسکری اور مالی مدد فراہم کی جاتی رہی ہے۔ تاہم، زلنسکی کو ٹرمپ کی جیت سے یہ خدشہ ہے کہ امریکہ اس امداد کو محدود کردے گا۔
ٹرمپ کے بیانات سے یہ ظاہر ہوتا ہے کہ وہ روس اور یوکرین کے درمیان جنگ کے مخالف ہیں اور انہوں نے یہ بھی کہا تھا کہ وہ ’24 گھنٹوں میں جنگ کو روک سکتے ہیں۔ ٹرمپ نے تنازع کے حل کے لیے کچھ مقبوضہ علاقوں کو روس کے حوالے کرنے کا بھی مشورہ دیا تھا۔
ٹرمپ کا اپنی مہم کے دوران یہ بھی کہنا تھا کہ بائیڈن انتظامیہ امریکی عوام کے ٹیکس کی رقم کو یوکرین جیسے ملکوں پر خرچ کر رہی ہے جبکہ امریکہ کو ضرورت ہے کہ وہ پہلے اپنے مسائل کو حل کرے۔
ٹرمپ کا یوکرینی صدر کو ’شاندار سیلز مین‘ قرار دیتے ہوئے طنزیہ انداز میں کہنا تھا کہ وہ امریکہ سے 60 بلین ڈالر لے جاتے ہیں۔ ان کے ممکنہ نائب صدر جے ڈی وینس بھی یوکرین کی مدد کو لے کر عدم دلچسپی کا اظہار کرچکے ہیں۔
امریکا میں نائب صدر منتخب ہونے والے جے ڈی وینس کون ہیں؟
یوکرین میں اس بات کی تشویش ہے کہ ٹرمپ کی صدارت میں اگر امریکہ کی پالیسی میں تبدیلی آئی تو یوکرین کو جنگ میں مدد کے لیے مزید مشکلات ہوسکتی ہیں۔
