کراچی میں بینک کے باہر شہری سے لوٹ مار کی سی سی ٹی وی فوٹیج منظرعام پر آگئی۔
اے آر وائی نیوز کے مطابق کراچی کے علاقے میٹروول سائٹ میں چند روز قبل واقعہ پیش آیا، بینک کے باہر ڈکیتی مزاحمت پر فائرنگ کرکے شہری کو زخمی کیا گیا۔
واردات کی ویڈیو میں دیکھا جاسکتا ہے کہ شہری کے ساتھ موجود سیکیورٹی گارڈ اسلحہ نہیں چلا سکا، بینک کے سیکیورٹی گارڈ نے فائرنگ کی۔
اس دوران شہری نے مزاحمت کی تو رقم زمین پر بکھر گئی اور ڈاکو دو لاکھ پچیس ہزار لوٹ کر فرار ہوگئے۔
شہری نے مزاحمت کی تو ڈاکوؤں نے شہری کو فائرنگ کرکے زخمی کردیا، بینک کے سیکیورٹی گارڈ کی فائرنگ سے بوکھلا کر ڈاکو موٹر سائیکل چھوڑ کر فرار ہوگئے۔
پولیس کا کہنا ہے کہ واقعے کا مقدمہ درج کرلیا گیا ہے، سی سی ٹی وی فوٹیج اور دیگر شواہد کی مدد سے ملزمان کی گرفتاری کے لیے کوششیں جاری ہیں۔
واضح رہے کہ گزشتہ ماہ کراچی کے علاقے احسن آباد میں بیوی کے زیور بیچ کر بیمار بیٹی کے علاج کے لیے پیسے لانے والے شخص کو ڈکیتی مزاحمت پر قتل کردیا گیا تھا۔
یاد رہے کہ رواں سال شہر قائد میں ڈکیتی مزاحمت پر 104 افراد کو قتل کردیا گیا جبکہ متعدد افراد زخمی کیا جاچکا ہے۔
