اسلام آباد : ترجمان ڈائریکٹوریٹ آف پاسپورٹ اینڈامیگریشن کا پاسپورٹ دفاتر 24 گھنٹے کھلے رکھنے کے حوالے سے اہم بیان آگیا۔
تفصیلات کے مطابق اسلام آباد میں 24 گھنٹے پاسپورٹ دفاتر کھلے رکھنے کی خبروں کی تردید سامنے آگئی، ترجمان ڈائریکٹوریٹ آف پاسپورٹ اینڈامیگریشن نے اپنے بیان میں کہا دفاتر 24 گھنٹے کھلے رکھنے کا فیصلہ نہیں ہوا۔
ترجمان نے بتایا کہ دفاتر کو 24گھنٹے کھلنے رکھنےکے حوالے سے مختلف تجاویز زیر غورہیں، پرنٹنگ صلاحیت میں اضافے کے بعد مستقبل میں سروس کوبڑھایا جائے گا۔
ترجمان پاسپورٹ کا کہنا تھا اسلام آباد سمیت تمام بڑے شہروں میں خدمات کا دائرہ کار بڑھایا جائے گا۔
مزید پڑھیں : پاسپورٹ بنوانے کے خواہشمند افراد کے لئے خوشخبری
یاد رہے محکمہ پاسپورٹس میں نئے جدید پاسپورٹ پرنٹرز کی انسٹالیشن کا عمل مکمل کرلیا گیا ہے،نئی مشینری کے اضافے سے محکمہ پاسپورٹ کی پرنٹنگ صلاحیت میں اضافہ ہوا، 10 نئے پرنٹرز کی مدد سے پروڈکشن صلاحیت میں 2 گنا اضافہ ہوا۔
ڈی جی پاسپورٹس مصطفی جمال قاضی نے بتایا تھا کہ روزانہ کی بنیادپر 40 ہزار پاسپورٹس پرنٹ کئےجا رہے ہیں، اس سے قبل یومیہ صلاحیت 20ہزار پاسپورٹس تھی۔
