اسلام آباد: جوڈیشل کمیشن آف پاکستان نے سندھ ہائیکورٹ کے موجودہ معزز ججز کو آئینی بینچز کے ججز کیلیے نامزد کر دیا۔
چیف جسٹس پاکستان یحییٰ آفریدی کی سربراہی میں جوڈیشل کمیشن کا اجلاس ہوا جس کا اعلامیہ جاری کر دیا گیا۔ اجلاس میں سندھ ہائیکورٹ میں آئینی بینچ کی تشکیل کے سنگل پوائنٹ ایجنڈے پر غور کیا گیا۔
اعلامیے کے مطابق سندھ ہائیکورٹ کے چیف جسٹس شفیع صدیقی کی پیش کردہ تجویز کی توثیق کی گئی جس کے مطابق عدالت عالیہ کے تمام ججز آئینی بینچز کیلیے 24 نومبر تک کام جاری رکھ سکیں گے۔
جوڈیشل کمیشن کا آئندہ اجلاس 25 نومبر کو ہوگا۔
چند روز قبل جوڈیشل کمیشن نے 7 رکنی آئینی بینچ تشکیل دیا تھا جس کے مطابق سینئر ترین جج جسٹس امین الدین بینچ کے سربراہ ہوں گے۔
جسٹس امین الدین خان اور جسٹس عائشہ ملک کا پنجاب سے آئینی بینچ کیلیے تقرر کر دیا گیا جبکہ جسٹس نعیم اختر افغان اور جسٹس جمال مندوخیل بلوچستان سے بینچ میں شامل ہیں۔
اسی طرح جسٹس محمد علی مظہر اور جسٹس حسن اظہر رضوی سندھ سے آئینی بینچ میں شامل ہیں جبکہ جسٹس مسرت ہلالی خیبر پختونخوا سے بینچ میں شامل ہیں۔
جوڈیشل کمیشن نے 5-7 کے تناسب سے تقرر کیا تھا۔
