کوئٹہ : ریلوے حکام نے کوئٹہ میں ہونے والے حالیہ افسوسناک واقعے کے بعد کوئٹہ سے ٹرینوں کی آمد ورفت 4 روز کے لیے بند کردی ہے یہ فیصلہ حفاظتی انتظامات کے پیش نظر کیا گیا ہے۔
اس حوالے سے ترجمان ریلوے کا کہنا ہے کہ 11 سے 14 نومبر تک کوئٹہ سے ٹرینوں کی آمدو رفت معطل رہے گی۔
ترجمان کے مطابق بولان میل 16نومبر کو کراچی سے کوئٹہ کیلئے روانہ ہوگی جبکہ 18نومبر کو کوئٹہ سے کراچی کیلئے روانہ ہوگی۔
اس کے علاوہ جعفر ایکسپریس 14 نومبر کو پشاور سے کوئٹہ روانہ ہوگی جبکہ 15نومبر کو کوئٹہ سے دوبارہ روانہ ہوگی۔
یاد رہے کہ بلوچستان کے دارالحکومت کوئٹہ کے ریلوے اسٹیشن میں خودکش دھماکے کے نتیجے میں 26 افراد جاں بحق اور 50 سے زائد زخمی ہوگئے، جاں بحق و زخمیوں میں خواتین اور بچے بھی شامل ہیں۔
ریسکیو حکام کے مطابق دھماکا جعفر ایکسپریس کے گزرنے کے وقت ریلوے اسٹیشن کے اندر پلیٹ فارم میں ہوا،
سی ٹی ڈی حکام کا کہنا ہے کہ واقعے کا مقدمہ ریلوے پولیس کی مدعیت میں نامعلوم ملزمان کے خلاف درج کیا گیا ہے۔ مقدمے میں قتل، اقدام قتل اور دہشت گردی کی دفعات شامل کی گئی ہیں۔
