ایران دارالحکومت تہران میں اسرائیل کے حالیہ حملوں کے بعد ’دفاعی سرنگ‘ کی تعمیر کا کام شروع کردیا گیا۔
برطانوی خبر رساں ادارے روئٹرز نے ایران کی نیم سرکاری نیوز ایجنسی ’تسنیم‘ کے حوالے سے رپورٹ دی ہے کہ دفاعی سرنگ بنانے کا فیصلہ اسرائیل کی جانب سے ملک میں مختلف اہداف کو نشانہ بنانے کے بعد سامنے آیا ہے۔
تہران میٹرو کے ایک اسٹیشن کو شہر کے وسط میں موجود ٹنل امام خمینی اسپتال سے ملائے گی، جس کے باعث اس اسپتال تک زیرزمین رسائی ممکن ہوجائے گی۔
تہران سٹی کونسل کے ٹرانسپورٹ کے ہیڈ نے ایران کی نیم سرکاری نیوز ایجنسی ’تسنیم‘ کو بتایا کہ ’ملک کی تاریخ میں پہلی بار دفاعی تناظر سے ایک سرنگ کی تعمیر کا کام جاری ہے۔
واضح رہے کہ گزشتہ ماہ اسرائیل نے ایران پر پہلی مرتبہ باضابطہ تسلیم شدہ حملہ کیا تھا، اس حملے میں تہران کے قریب واقع میزائل کی فیکٹریوں اور دیگر عمارتوں کو نشانہ بنایا گیا تھا۔
دوسری جانب اسرائیلی وزیراعظم نیتن یاہو نے ایک بار پھر ایران کی تیل کی تنصیبات پر حملے کی دھمکی دی ہے۔
نیتن یاہو کا اپنے بیان میں کہنا تھا کہ ایران کی جانب سے حملے کی صورت میں اسرائیل ایران کی تیل کی تنصیبات پرحملہ آور ہوسکتا ہے۔
اسرائیلی وزیراعظم کی جانب سے یہ بیان ایسے وقت میں سامنے آیا ہے جب اسرائیلی صدر امریکی دورے پر ہیں جہاں اُن کی امریکی صدر بائیڈن سے ملاقات متوقع ہے۔
میڈیا رپورٹس کے مطابق اسرائیلی وزیراعظم کا کہنا تھا کہ اسرائیل پر ایران کی جانب سے ایک اور حملہ ایرانیوں پر اربوں روپے کے ڈاکے کے مترادف ہوگا۔
حزب اللہ کے راکٹ حملوں میں 2 اسرائیلی ہلاک
انہوں نے دھمکی آمیز لہجے میں کہا کہ اگر اسرائیل نے ایرانی تیل کی تنصیبات پر حملہ کردیا تو ایران میں معاشی تباہی کی صورتحال پیدا ہوجائے گی۔
