علی گڑھ: بھارتی ریاست یو پی میں ایک افسوس ناک واقعہ پیش آیا ہے جس میں ای رکشے میں بیٹھی ایک ڈیڑھ سالہ بچی گاڑی کی ٹکر لگنے کے باعث ماں کی گود سے اڑ کر نالے میں جا گری۔
بھارتی میڈیا رپورٹس کے مطابق اترپردیش کے ضلع علی گڑھ کے علاقے ایل پور گدھیا میں سڑک حادثے میں اس وقت ایک بچی کی موت ہو گئی جب ایک گاڑی کی ٹکر کی وجہ سے وہ نالے میں گری۔
جعمرات کی شام کو پیش آئے واقعے میں میونسپل کارپوریشن کی کچرا اٹھانے والی گاڑی نے ای رکشہ کو زور دار ٹکر ماری تھی، جس کی وجہ سے رکشے میں بیٹھی ماں کی گود سے ڈیڑھ سالہ بچی اڑ کر نالے میں گر گئی اور ڈوب گئی، حادثے میں تین دیگر افراد بھی زخمی ہوئے۔
رپورٹ کے مطابق دلیپ کمار نامی شخص شہر سے سامان لے کر اپنی بیوی، ڈیڑھ سالہ بیٹی پرگیہ اور خالہ کے ساتھ گاؤں واپس جا رہا تھا کہ بننا دیوی علاقے میں پیچھے سے آنے میونسپل کارپوریشن کی کچرا اٹھانے والی گاڑی نے ان کے ای رکشے کو ٹکر مار دی۔ ٹکر اتنی اتنی زوردار تھی کہ ڈیڑھ سالہ پرگیہ اڑ کر سڑک کے کنارے نالے میں جا گری۔
معصوم بچی نالے میں گرنے کے بعد ڈوب گئی، جسے بچایا نہیں جا سکا، واقعے کے بعد مشتعل مقامی لوگوں نے لڑکی کے اہل خانہ کی حمایت میں سڑک بلاک کر دی اور قصوروار میونسپل کارپوریشن ڈرائیور کے خلاف کارروائی کا مطالبہ کیا۔ پولیس نے اہل خانہ کی شکایت پر فرار ڈرائیور کے خلاف مقدمہ درج کر لیا، اور میونسپل کارپوریشن کی گاڑی کو ضبط کر لیا گیا۔
