سکھر: 14 سالہ بچے کے اغوا اور قتل میں ملوث ملزم کو گرفتار کرلیا گیا ،ملزم نے تاوان نہ دینے پر بچے کا گلہ کاٹ کر قتل کردیا تھا۔
تفصیلات کے مطابق پولیس نے 14 سالہ بچے کے اغوا اور قتل میں ملوث ملزم گرفتار کرلیا، ایس ایس پی سکھر امجد شیخ نے بتایا کہ 14 سالہ فہیم میرانی چند روز قبل اے سیکشن تھانے کی حدود سے لاپتہ ہوا، جس کے بعد اہلخانہ کی جانب سے بچے کی گمشدگی کی اطلاع پولیس کو دی گئی تھی۔
امجد شیخ کا کہنا تھا کہ کچھ دن بعد نامعلوم نمبر سے بچے کی رہائی کے بدلے تاوان مانگا گیا تاہم پولیس نے ٹیکنیکل بنیادوں پر کارروائی کرکے ملزم عثمان بندھانی کو گرفتار کرلیا۔
ملزم نے دوران تفتیش ساتھی کی مدد سے بچے کو اغوا کرنے کا انکشاف کیا، ملزم نے تاوان کیلئے ورثا کو فون کیا اور رقم نہ ملنے پر بچے کو قتل کردیا۔
ملزم نے بتایا کہ اس نے ساتھی کی مدد سے بچے کا گلہ کاٹ کرقتل کیا اور قتل کے بعد ملزمان نے بچے کی لاش کینال میں پھینک دی تھی۔
ملزم کیخلاف تھانہ اے سیکشن میں مقدمہ درج کرلیا ہے اور ساتھی کی گرفتاری کیلئے چھاپے جاری ہے۔
