اسلام آباد: تحریک انصاف کے رہنما اور رکن قومی اسمبلی علی محمد خان نے کہا ہےکہ قوم فیصلہ کرچکی ہےکہ پاکستان بانی پی ٹی آئی ٹھیک کرینگے۔
تفصیلات کے مطابق تحریک انصاف کے رہنما نے میڈیا سے گفتگو میں کہا کہ اللہ نےکل بانی پی ٹی آئی کو بڑی کامیابی دی، بانی پی ٹی آئی پر توشہ خانہ کا جعلی کیس بنایا گیا، کل ایک امید پیدا ہوئی کہ بانی پی ٹی آئی باہر نکلیں گے۔
علی محمد خان کا کہنا تھا کہ عدالت کے فیصلے کے بعد کل رات ایک اور کیس میں گرفتاری ڈال دی گئی، یہ سمجھتے ہیں اس طرح بانی پی ٹی آئی ٹوٹ جائے گا، بانی پی ٹی آئی ٹوٹنے کیلئے بنا ہی نہیں ہے۔
انہوں نے کہا کہ ہم بانی پی ٹی آئی کیساتھ اس لئےکھڑے ہیں کہ بہتر ملک بناسکیں لیکن آپ نے ہر ممکن کوشش کی، پارٹی سے انتخابی نشان چھینا، آپ نے بانی پی ٹی آئی کے لوگوں کو دوسری جماعتوں میں شامل کرایا، وہ لوگ جن کا پی ٹی آئی پر اعتماد تھا انہیں بانی پی ٹی آئی سے دور کیا۔
علی محمد خان نے کہا کہ قوم فیصلہ کر چکی ہےکہ پاکستان بانی پی ٹی آئی ٹھیک کرینگے، 24 نومبر کو قوم نکلے گی، آپکے پاس اب بھی 2 دن ہیں کیوں کہ قوم کا ایک ہی نعرہ ہے بانی پی ٹی آئی باہر نکالو۔
علی محمد خان کا کہنا تھا کہ عمرانی معاہدہ ہونا چاہئے خان کو باہر آنا چاہئے، بانی پی ٹی آئی باہر آئے پھر تمام سیاسی جماعتیں بیٹھیں، اسٹیبلشمنٹ ادارے ملک کی حفاظت کیلئے ضروری ہیں، جب تک بانی پی ٹی آئی کو انگیج نہیں کرتے سیاسی استحکام نہیں آسکتا۔
