اسلام آباد: مارگلہ ویو پوائنٹ منصوبے کا ماسٹر پلان منظور کر لیا گیا، چیئرپرسن رعنا سعید خان نے اسے ماحول کی بحالی کی کوششوں میں ایک اہم سنگ میل قرار دیا۔
اسلام آباد وائلڈ لائف مینجمنٹ بورڈ (IWMB) کے زیر اہتمام ہونے والے پانچویں عمل درآمد کمیٹی کے اجلاس میں مارگلہ ویو پوائنٹ منصوبے کے ماسٹر پلان کو متفقہ طور پر منظور کر لیا گیا ہے۔
یہ منصوبہ مارگلہ ہلز نیشنل پارک کے ماحولیاتی نظام کو ایک مقبول سیاحتی مقام میں تبدیل کرنے کی کوششوں میں سنگ میل ثابت ہوگا، معروف آرکیٹیکٹ عمرانہ ٹوانہ اور کولیبریٹنگ آرکیٹیکٹ ڈی بی اسٹوڈیو کا تیار کردہ جامع ماسٹر پلان شراکت داروں کے درمیان پیچیدہ منصوبہ بندی اور تعاون کا نتیجہ ہے، جس سے مارگلہ کی پہاڑیوں کا قدرتی حسن بحال ہوگا اور رہائشیوں اور سیاحوں کے لیے ایک منفرد تفریحی مقام بھی فراہم ہوگا۔
اس منصوبے کے نمایاں پہلوؤں میں شامل ہیں چہل قدمی کے لیے راستے، جس سے سیاح پہاڑیوں کے قدرتی مناظر دیکھ سکیں گے، عکاسی کرنے والا پول، اوپن ایئر ایمفیتھیٹر، بچوں کے لیے پلے ایریا، بزرگوں کے بیٹھنے کی جگہیں، جائے نماز، وزیٹر انفارمیشن سینٹر اور دفاتر کی جگہ جہاں سے مارگلہ ہلز نیشنل پارک کی نباتات اور حیوانات کے بارے میں معلومات لی جا سکیں گی اور پارکنگ ایریا۔
ڈبلیو ڈبلیو ایف پاکستان اس منصوبے کے لیے مالی معاونت فراہم کرے گی، ماسٹر پلان اور مکمل شدہ انوائرمینٹل امپیکٹ اسسمنٹ (EIA) کو منظوری کے لیے انوائرنمنٹ پروٹیکشن ایجنسی کو پیش کیا جائے گا۔ چئرپرسن رعنا سعید کا کہنا ہے کہ ماسٹر پلان کی منظوری مارگلہ پہاڑیوں کے ماحولیاتی نظام کو بحال کرنے کی ہماری کوششوں میں ایک اہم سنگ میل کی نشان دہی کرتی ہے۔
