اسلام آباد : سری نگر ہائی وے پر 4 رینجرز اہلکاروں کی شہادت کے بعد حکومت نے شرپسندوں کو موقع پر گولی مارنے کے واضح احکامات جاری کردیئے۔
تفصیلات کے مطابق اسلام آباد میں گزشتہ رات سری نگر ہائی وے پر 4 رینجرز اہلکاروں کی شہادت کے بعد اسلام آباد میں آرٹیکل 245 کے تحت پاک فوج کو بلالیاگیا۔
سیکیورٹی ذرائع نے کہا ہے کہ شرپسندوں سےآہنی ہاتھوں سےنمٹنے کیلئے احکامات دیدیے گئے، انتشاریوں اور شرپسندوں کو موقع پر گولی مارنے کے واضح احکامات جاری کئے گئے ہیں۔
ذرائع کا کہنا تھا کہ دہشتگردانہ کارروائی سے نمٹنے کیلئےاقدامات بروئے کار لائے جارہے ہیں۔
یاد رہے سری نگر ہائی وے پر شرپسندوں نے گاڑی رینجرز اہلکاروں پر چڑھا دی جس کے نتیجے میں 4 رینجرز اہلکار شہید جبکہ 5 رینجرز اور پولیس کے جوان شدید زخمی ہوئے تھے۔
مزید پڑھیں : اسلام آباد : رینجرز اہلکاروں کی شہادت : پاک فوج کو بلا لیا گیا
سیکیورٹی ذرائع کے مطابق اب تک شرپسندوں کے حملوں میں رینجرز کے چار اور پولیس کے دو اہلکار شہید ہوچکے جبکہ سو سے زائد پولیس اہلکار زخمی ہیں، جس میں سے متعدد کی حالت تشویشناک ہیں۔
خیال رہے وزیر داخلہ نے پی ٹی آئی مظاہرین کو خبردار کیا تھا کہ پہلے سے بتارہے ہیں ہمیں مجبور کیا گیا تو سخت قدم اٹھائیں گے، بار بار سمجھا رہے ہیں، ریڈ لائن کراس کرنے پرمجبور نہ کریں، اس سے پہلے بھی ڈی چوک میں کبھی کسی کو احتجاج کرنے کی اجازت نہیں دی گئی۔
ان کا کہنا تھا کہ صبر کر رہے ہیں، جو ڈی چوک پہنچے گا گرفتار ہوگا،یہ نہیں ہوسکتا کوئی شخص یہاں پہنچے اور پھر آسانی سے واپس چلا جائے۔
