اسلام آباد : سینیٹر فیصل واوڈا کا کہنا ہے کہ بشریٰ بی بی نے بانی پی ٹی آئی کی سیاسی قبر کھود دی ہے، اب بانی کی سیاسی طور پر تکلیفیں بڑھیں گی۔
تفصیلات کے مطابق سینیٹر فیصل واوڈا نے اے آر وائی نیوز سے خصوصی گفتگو میں پی ٹی آئی کے احتجاج کے حوالے سے کہا کہ بتا دیا تھا کہ پی ٹی آئی ڈی چوک آئےگی تودھلائی ہوگی اورگرفتاریاں ہوں گی، بشریٰ بی بی نےبانی پی ٹی آئی کی سیاسی قبرکھوددی ہے، بتادیاتھاکہ پی ٹی آئی بہت بڑی غلطی کرے گی اوربانی پی ٹی آئی کا نقصان ہوگا۔
سینیٹر واوڈا کا کہنا تھا کہ بشریٰ بی بی کی سیاست نےبانی پی ٹی آئی کی سیاست کوختم کردیاہے اور بانی پی ٹی آئی کی سیاست میں آخری کیل ٹھونک دی۔
انھوں نے کہا کہ بشریٰ بی بی اور علی امین ایک دوسرے پر ذمہ داری ڈالتے رہے، دونوں نے ایک ہی گاڑی میں فرارہوئے، 2 ،3 دن پہلے بتایا تھا کوئی ڈی چوک آئے گا حکومت دھوئے گی، یہ کارکنان کو ہمیشہ کی طرح بے یارو مدد گار چھوڑ کر بھاگ گئے۔
سینیٹر کا مزید کہنا تھا کہ بانی پی ٹی آئی کی آنکھوں پر پٹی بندھ گئی،وہ بیگم سے آگے کچھ نہیں دیکھ رہے، بشریٰ بی بی نے تباہی مچانے تھی،آخری تابوت میں کیل ٹھونک دی گئی۔
انھوں نے بتایا کہ پی ٹی آئی کی مشکلات میں اب مزیداضافہ ہوجائےگا، بشریٰ بی بی اورعلی امین گنڈاپور کو بھی جلد پکڑ لیا جائے گا، ،علی امین گنڈا پور اور بشریٰ بی بی کا مستقبل جیل کی سلاخوں کے پیچھے ہوگا۔
سینیٹر واوڈا نے کہا کہ بانی پی ٹی آئی کو کوئی بتائےکہ بی بی نے پارٹی پرقبضہ کیاآپ کوتباہ کردیا، بانی پی ٹی آئی کی صورتحال اب مزیدخراب ہوگی۔
ان کا مزید کہنا تھا کہ فیض حمید کی کورٹ مارشل کی صورتحال بھی قریب ہے،ملٹری کورٹ کا عنصربھی موجود ہے،نومئی کا ٹرائل بھی اب مکمل ہوگا اور بدمعاشی اورچڑھائی کے جراثیم اب ہمیشہ کیلئےختم ہوجائیں گے۔
