ممبئی: بھارتی اداکارہ اور کینسر سے نبردآزما حنا خان، بالی ووڈ کے سلطان سلمان خان کے رویے سے بےحد متاثر ہوئیں۔
بھارتی ٹی وی کی اداکارہ حنا خان اس وقت بریسٹ کینسر کا شکار ہیں لیکن اس کے باوجود وہ کام کرتی رہتی ہیں اور اپنے مداحوں کی حوصلہ افزائی کرتی رہتی ہیں۔
حال ہی میں اداکارہ حنا خان بگ باس 18 میں بطور مہمان نظر آئیں، جہاں ان کی سلمان خان کے ساتھ جذباتی بات چیت ہوئی جس کی ویڈیو سوشل میڈیا پر وائرل ہے۔
View this post on Instagram
تاہم اداکارہ حنا خان نے بھی فوٹو اینڈ شیئرنگ ایپ انسٹاگرام پر اداکار سلمان خان کے ساتھ تصویر شیئر کی جس میں انہیں بگ باس کے سیٹ پر دیکھا جاسکتا ہے۔
حنا نے انسٹاگرام پر سلمان خان کے ساتھ دلکش تصاویر شیئر کرتے ہوئے ان کی مہربانی کا شکریہ ادا کیا، اداکارہ نے لکھا کہ سلمان خان کے ساتھ ملاقاتوں سے ہمیشہ کچھ نہ کچھ سیکھا ہے، لیکن اس بار ملاقات مختلف تھی۔
اداکارہ نے لکھا کہ سلمان خان نے ملاقات میں میری بیماری اور علاج سے متعلق ہر چھوٹی تفصیل معلوم کی اور میرا حوصلہ بڑھانے کی کوشش کی۔
اداکارہ حنا خان نے سلمان خان کی تعریف میں لکھا کہ سلمان خان کا یہ انداز میرے لیے بےمثال تھا، انہوں نے یقین دلایا کہ میں 1000 فیصد ٹھیک ہوجاؤں گی۔
واضح رہے کہ حنا خان نے حال ہی میں چھاتی کے سرطان میں مبتلا ہونے کا انکشاف کیا اور بتایا کہ انہیں اسٹیج 3 کے کینسر کی تشخیص ہوئی ہے، جس کے بعد سوشل میڈیا پر وہ اپنی صحت اور علاج سے متعلق معلومات شیئر کرتی رہتی ہیں۔
دوسری جانب حنا خان کی پوسٹ پر مداح ان کی ہمت کی داد دیتے ہوئے ان کی جلد صحت یابی کے لیے دعائیں کر رہے ہیں۔
