اسلام آباد: سابق خاتون اوّل بشریٰ بی بی کی گرفتاری کیلیے قومی احتساب بیورو (نیب) راولپنڈی کی ٹیم خیبر پختونخوا بھجوا دی گئی۔
ذرائع نے اے آر وائی نیوز کو بتایا کہ بشریٰ بی بی کو 190 ملین پاؤنڈ کیس میں وارنٹ جاری ہونے پر گرفتار کیا جائے گا، نیب کی ٹیم 3 روز پہلے بھی کے پی میں گرفتاری کی کوشش کرتی رہی۔
ذرائع نے بتایا کہ آج دوبارہ سے نیب کی ٹیم گرفتاری کیلیے تشکیل دی گئی، نیب کے پی کو بھی ٹیم سے مکمل تعاون کی ہدایت کر دی گئی، نیب خیبر پختونخوا پولیس کی بھی مدد لے گی۔
گزشتہ روز سینیٹر فیصل واوڈا نے ایک بیان میں دعویٰ کیا تھا کہ پی ٹی آئی پر پابندی لگنے والی ہے جبکہ بشریٰ بی بی گرفتار ہوں گی۔
فیصل واوڈا نے کہا تھا کہ پی ٹی آئی سے 9 مئی کروانا گدھ کا کام تھا، سنگجانی میں جلسہ کرنے پر راضی ہو جاتے تو عزت رہ جاتی۔
انہوں نے کہا تھا کہ بانی پی ٹی آئی کو بچانے کی کوشش کر رہا ہوں اور کروں گا، ایک خاتون نے کہا کہ ڈی چوک ہی جاؤں گی پھر وہاں سے فرار ہوگئیں۔
یاد رہے کہ 22 نومبر کو راولپنڈی کی احتساب عدالت نے 190 ملین پاؤنڈ ریفرنس میں بشریٰ بی بی کے ناقابلِ ضمانت وارنٹ گرفتاری جاری کیے تھے جو عدالت نے آج بھی برقرار رکھے ہیں۔
کیس کی سماعت احتساب عدالت کے جج ناصر جاوید رانا نے کی تھی۔ عدالت نے بشریٰ بی بی کے ضامن کو بھی شوکاز جاری کیا تھا جبکہ بانی پی ٹی آئی کو بھی 19 ملین پاؤنڈز کیس میں عدالت میں پیش کیا گیا تھا۔
سابق خاتون اوّل کو وارنٹ گرفتاری مسلسل عدم حاضری کے باعث جاری کیے گئے تھے۔ عدالت نے نیب کو ملزمہ کو گرفتار کر کے 26 نومبر کو پیش کرنے کی ہدایت کی تھی۔
