بہار : چیمپیئنز ٹرافی کے لیے کرکٹ ٹیم کو پاکستان نہ بھیجنے کے معاملے پر بھارتی سیاستدان بھی مودی حکومت کی دوغلی پالیسی کے خلاف پھٹ پڑے۔
اس حوالے سے بھارتی ریاست بہار کے سابق نائب وزیراعلیٰ تیجسوی یادیو کہا کہنا ہے کہ مودی بریانی کھانے پاکستان جاسکتے ہیں تو بھارتی ٹیم کرکٹ کھیلنے کیوں نہیں جاسکتی؟
اپنے ایک بیان میں نریندر مودی کی حکومت اور بھارتی کرکٹ بورڈ (بی سی سی آئی) کو تنقید کا نشانہ بناتے ہوئے ان کا کہنا تھا کہ چیمپئینز ٹرافی ٹیم کو پاکستان جانا چاہیے تھا، کھیلوں میں سیاست کو شامل کرنا مناسب عمل نہیں ہے۔
ان کا مزید کہنا تھا کہ کھیل میں سیاست کرنے والے ٹھیک نہیں کررہے، کھیل کے میدان میں کھیل ہوتا ہے، جنگ نہیں۔
واضح رہے کہ تیجسوی یادیو بھارت کے سینئر سیاستدان لالو پرساد یادیو کے چھوٹے صاحبزادے ہیں جو ریاست بہار کے ڈپٹی چیف منسٹر بھی رہ چکے ہیں۔
یاد رہے کہ بھارتی کرکٹ ٹیم نے آخری بار سال 2008 میں ایشیا کپ میں شرکت کیلیے پاکستان کا دورہ کیا تھا۔
دونوں حریف ٹیموں کے درمیان آخری دو طرفہ سیریز 2012-13 میں بھارت میں کھیلی گئی تھی۔ تاہم، اس کے بعد سے پاک بھارت سیاسی تعلقات میں خرابی کے باعث دونوں ٹیمیں صرف آئی سی سی کے ٹورنامنٹس میں آمنے سامنے آتی ہیں۔
