کراچی : ارشد پپو قتل کیس میں لیاری گینگ وار کے سرغنہ عزیر بلوچ، اس کے بھائی زبیر بلوچ سمیت 4 ملزمان نے بریت کی درخواستیں دائرکردیں۔
انسداددہشت گردی عدالت میں لیاری گینگ وارکے سرغنہ عزیربلوچ ودیگر کیخلاف ارشد پپو قتل کیس کی سماعت ہوئی، جیل حکام نے سرغنہ لیاری گینگ وار اور اس کے بھائی زبیربلوچ کو پیش کیا۔
دوران سماعت عزیر بلوچ اور اس کے بھائی زبیر بلوچ سمیت 4 ملزمان نے بریت کی درخواستیں دائر کردیں۔
مقدمےکےسابق تفتیشی افسر ڈی ایس پی کی عدم پیشی پر عدالت نے اظہار برہمی کرتے ہوئے سابق تفتیشی افسرڈی ایس پی بغدادی عابد انصاری کو آئندہ سماعت پر طلب کرلیا۔
عدالت نے متعلقہ ایس ایس پی کو آئندہ سماعت پر سابق تفتیشی افسر کو پیش کرنے کا حکم دے دیا ، عابد زمان ایڈووکیٹ نے بتایا کہ عزیربلوچ ودیگرملزمان کے خلاف شواہد موجود نہیں ہیں، ملزمان کومقدمے سے بری کیا جائے۔
عدالت نے عزیربلوچ، زبیر بلوچ، اکرم بلوچ اور ذاکربلوچ کی بریت کی درخواستوں پر دلائل طلب کرلئے اور کیس کی سماعت7دسمبرتک ملتوی کردی۔
پولیس بے بتایا کہ ارشد پپو سمیت 3 افراد کو لیاری گینگ وار کے ملزمان انتہائی بےرحمی سے قتل کیا تھا، مقدمے میں گینگ وار کے سرغنہ اور اس کے بھائی زبیر بلوچ گرفتار ہیں جبکہ مقدمے میں شاہ جہان بلوچ، ذاکر بلوچ، اکرم بلوچ اور یوسف بلوچ ضمانت پر رہا ہیں، لیاری گینگ وار کے کارندوں کے خلاف تھانہ کلاکوٹ میں مقدمہ درج ہے۔
