مسلم لیگ ن کے سابق رہنما محمد زبیر نے کہا ہے کہ پاکستان تحریک انصاف کو سیاسی جماعت کے بجائے دشمن کا درجہ دیدیا گیا۔
اے آر وائی کے پروگرام سوال یہ ہے میں گفتگو کرتے ہوئے سابق گورنر سندھ محمد زبیر کا کہنا تھا کہ میرے خیال سے بات چیت نہیں ہونے جارہی، وزیراعظم نے کہا تھا سب کیخلاف مقدمات درج کریں۔
انھوں نے کہا کہ پنجاب اور کے پی اسمبلی کے انتخابات نہیں کرائے گئے، بار بار لوگوں کے مینڈیٹ کو تسلیم نہیں کریں گے تو مسائل حل نہیں ہوں گے۔
محمد زبیر کا مزید کہنا تھا کہ مجھے تو لگتا ہے یہ 2029 سے پہلے بل پاس کرائیں گے کہ ابھی الیکشن نہیں ہوسکتے۔
دریں اثنا اسی پروگرام میں مصطفیٰ نواز کھوکھر نے کہا کہ سیاست کو اتنا تلخ بنادیا گیا کہ آج ایک دوسرے کے ساتھ بیٹھنے کو تیار نہیں، سب کہہ رہے ہیں سیاستدانوں کو ایک دوسرے کے ساتھ بیٹھنا چاہیے۔
مصطفیٰ نواز نے کہا کہ حالات تقاضہ کررہے ہیں کہ ہمیں ایک دوسرے کے ساتھ بیٹھنا چاہیے، گھر پر آگ لگی ہوئی ہے اور ہم سب گھر کو باہر سے جلتا دیکھ رہے ہیں۔
انھوں نے کہا کہ سیاست میں لاٹھی کا استعمال ہونا ہی نہیں چاہیے دلیل کا استعمال کرنا چاہیے، جس پارلیمنٹ میں کیمرے لگے ہوں، ارکان کوگرفتار کریں اس کی اہمیت ختم ہوجاتی ہے۔
