معروف تیلگو اداکار اللو ارجن کو اپنے مداحوں کو ’آرمی‘ کہنا مہنگا پڑگیا، اداکار کے خلاف شکایت درج کروائی گئی۔
بھارتی میڈیا کے مطابق اداکار اللو ارجن برسوں سے اپنے مداحوں کو اپنی ’فوج‘ کہہ کر پکارتے ہیں لیکن پشپا 2: دی رول کی تشہیر کے دوران جب انہوں نے اپنے مداحوں کو ’آرمی‘ قرار دیا تو لوگوں نے اعتراض کیا۔
بھارتی میڈیا کے مطابق سری نواس گوڈ نامی ایک شخص نے اداکار کے خلاف حیدرآباد کے جواہر نگر پولیس اسٹیشن میں شکایت درج کرائی، انہوں نے اپنی درخواست میں الو ارجن کے اس بیان کو قابل اعتراض قرار دیا۔
View this post on Instagram
بھارتی میڈیا پر وائرل پوسٹ میں انہیں کہتے ہوئے سنا جاسکتا ہے کہ ہم نے ٹالی ووڈ اسٹار اللو ارجن کے خلاف شکایت درج کرائی ہے جس میں ان سے درخواست کی گئی ہے کہ وہ اپنے مداحوں کے لیے آرمی کا لفظ استعمال نہ کریں۔
ان کا کہنا تھا ’آرمی ایک معزز عہدہ ہے، آپ اپنے مداحوں کو آرمی نہیں کہہ سکتے، یہ وہی ہیں جو ہمارے ملک کی حفاظت کرتے ہیں، اس کے لیے بہت سے دیگر الفاظ موجود ہیں جن کا استعمال کیا جا سکتا ہے‘۔
بھارتی میڈیا کے مطابق ممبئی میں فلم کی تشہیر کے دوران اللو ارجن نے کہا تھا کہ میرے پاس مداح نہیں ایک آرمی ہے، میں اپنے مداحوں سے محبت کرتا ہوں، وہ میری فیملی کی طرح ہیں۔
اللو ارجن کا کہنا تھا کہ یہ میرے ساتھ کھڑے ہوتے ہیں، میری کامیابی کا جشن مناتے ہیں اور میرا دفاع کرتے ہیں، میں آپ سب سے محبت کرتا ہوں، اگر یہ فلم بڑی ہٹ ہوتی ہے تو میں اسے اپنے تمام مداحوں کے نام کروں گا۔
