شمالی میکسیکو میں مسلح افراد کی فائرنگ کے نتیجے میں 9 افراد ہلاک جبکہ 5 شدید زخمی ہوگئے۔
بین الاقوامی خبر رساں ادارے کی رپورٹ کے مطابق ریاست گواناجواتو کے قصبے اپاسیو دیل گراندے میں ایک کھوکھے اور اس کے گاہکوں پر مسلح افراد نے حملہ کیا۔ حملے میں 9 افراد موقع پرہی زندگی کی بازی ہار گئے۔
رپورٹس کے مطابق حملہ آوروں نے پہلے کھوکھے پر موجود لوگوں پر اور پھر آس پاس کے گاہکوں پر اندھا دھند فائرنگ کی۔ حملہ آوروں کی گرفتاری کے لئے بڑے پیمانے پر آپریشن کا آغاز کردیا گیا ہے۔
واضح رہے کہ گزشتہ ماہ بھی میکسیکو کے ایک بار پر مسلح افراد نے اندھا دھند فائرنگ کی تھی، جس میں 6 افراد ہلاک اور پانچ زخمی ہوگئے تھے۔
فائرنگ کا واقعہ میکسیکو کے ساحلی صوبے تاباسکو کے ایک بار میں پیش آیا جو ان دنوں بڑھتے ہوئے تشدد کی لپیٹ میں ہے۔
ریاستی اٹارنی جنرل کے دفتر کے ڈپٹی پراسیکیوٹر گلبرٹو میلکیڈیس مرانڈا نے نامہ نگاروں کو بتایا کہ پانچ افراد جائے وقوعہ پر مردہ حالت میں ملے جب کہ ایک زخمی اسپتال میں دوران علاج دم توڑ گیا تھا۔
خواتین کے لیے سب سے خطرناک جگہ اُن کا گھر ہے، اقوام متحدہ
ڈپٹی پراسیکیوٹر نے کہا کہ ابتدائی رپورٹس سے ظاہر ہوتا ہے کہ مسلح افراد کا گروپ ایک شخص کی تلاش میں نائٹ کلب میں داخل ہوا اور وہاں موجود لوگوں پر فائرنگ کردی۔
