بھارتی فلم انڈسٹری دیون ورما کو بہترین کامیڈین کے طور پر جانتی ہے اور خاص طور پر شیکسپیئر کے ڈرامے ’کامیڈ ی آف ایررز‘ پر بننے والی ہندی فلم ’انگور‘ میں دیون ورما کی بے مثال اداکاری آج بھی فلم بینوں کو یاد ہے۔ ہندوستانی فلم انڈسٹری کا یہ مزاحیہ اداکار 2 دسمبر 2014ء کو چل بسا تھا۔
معروف نغمہ نگار اور فلم ساز گلزار کی اس فلم میں دیون ورما نے بہادر کا کردار ادا کیا تھا۔دیون ورما کی یادگار فلموں میں ’چور کے گھر کے چور‘ اور ’چوری میرا کام‘ بھی شامل ہیں جن پر انھیں بہترین کامیڈین کا فلم فيئر ایوارڈ بھی دیا گیا۔ دیون ورما نے اداکاری ہی نہیں بلکہ پانچ فلمیں پروڈیوس اور چار فلمیں ڈائریکٹ بھی کیں۔
بالی وڈ کے اس باکمال فن کار اور بے مثال اداکار نے بھارت کے شہر پونے میں 77 سال کی عمر میں وفات پائی۔ دیون ورما دل اور گردوں کے عارضے میں مبتلا تھے۔ دیون ورما پونا میں پیدا ہوئے تھے اور یہیں سے تعلیمی مراحل طے کیے اور سیاسیات اور سوشیالوجی میں سند یافتہ ہوئے۔ اداکار دیون ورما نے سنہ 1961 میں فلم ’دھرم پترا‘ سے فلمی سفر کا آغاز کیا تھا اور 2013ء تک ’کلکتہ میل‘ سمیت کئی فلموں میں کام کرکے خوب داد وصول کی۔ ان کی یادگار فلموں میں ” انداز اپنا اپنا“ ،’’ دل تو پاگل ہے“، ” گول مال“ ،” جدائی“ ”عشق“، ”کیا کہنا“، ” سلاخیں“، ” میرے یار کی شادی“، ” ہلچل“ اور ”کورا کاغذ“ بھی شامل ہیں۔
کامیڈین دیون ورما نے اپنے فلمی کیرئیر میں یوں تو مختلف کردار نہایت خوبی سے نبھائے۔ لیکن ان کی وجہِ شہرت مزاحیہ کردار بنے۔ ’نادان‘، ’بڑا کبوتر‘، ’بے شرم‘ اور ’دانہ پانی‘ وہ فلمیں ہیں جو ان کی ہدایت کاری کا ثمر ہیں۔
