بالی ووڈ اداکارہ کنگنا رناوت نے پاپا رازی (فوٹو گرافرز) کو اپنی فلم دیکھنے کا مشورہ دے دیا۔
فوٹو اور ویڈیو شیئرنگ ایپ انسٹاگرام پر اداکارہ کنگنا رناوت کی ویڈیو وائرل ہورہی ہے جس میں وہ پاپا رازی کو فلم دیکھنے کا مشورہ دیتی دکھائی دے رہی ہیں۔
وائرل ویڈیو میں پاپا رازی اداکارہ سے پوچھتے ہیں کہ ’آپ کو فلم کیسی لگی۔؟‘ کنگنا پوچھتی ہیں کہ ’مجھے تو بہت اچھی لگی، آپ لوگوں نے دیکھ لی؟‘
پاپا رازی کہتے ہیں کہ نہیں دیکھی ہے جس پر کنگنا کہتی ہیں کہ ایسی بکواس فلمیں دیکھتے ہو تبدیلی کے لیے اچھی فلم بھی دیکھ لو۔
واضح رہے کہ چند روز قبل کنگنا رناوت کی فلم ’ایمرجنسی‘ کو آخرکار سنیما گھروں میں ریلیز کرنے کی اجازت مل گئی اب فلم 17 جنوری 2025 کو بڑے پردے کی زینت بنے گی۔
اداکارہ کی اس فلم کو 14 جون 2024 کو سینیما میں ریلیز ہونا تھا، لیکن فلم کی ریلیز مختلف جاری تنازعات کی وجہ سے ملتوی کر دی گئی تھی۔
بھارتی میڈیا کے مطابق فلم ایمرجنسی بھارتی جمہوریت کی تاریخ کے سب سے متنازعہ واقعات میں سے ایک ہندوستان کی پہلی خاتون وزیر اعظم، مسز اندرا گاندھی کے سیاسی کیریئر کے گرد گھومتی ہے جن کی پالیسیوں نے انڈیا کی تاریخ کو تبدیل کیا تھا۔
فلم ایمرجنسی میں کنگنا ناصرف مرکزی کردار ادا کر رہی ہیں بلکہ انہوں نے اس فلم کی ہدایت کار، مصنف اور پروڈیوسر کی ذمہ داریاں بھی نبھائی ہیں۔
اس فلم میں انوپم کھیر، ملند سومن، ماہیما چوہدری، اور شریاس تلپڑے سمیت دیگر کاسٹ بھی شامل ہیں، فلم میں شریاس تلپڑے نے اٹل بہاری واجپائی کا کردار ادا کیا ہے، جب کہ انوپم کھیر نے جے پرکاش نارائن کا کردار ادا کیا ہے۔
