موسم سرما میں خشک میوہ جات کے استعمال میں اضافہ ہوجاتا ہے ان میں بادام سرفہرست ہیں، جو ہو عمر کے افراد شوق سے کھاتے ہیں، لیکن ان کو مقررہ حد سے کھانا نقصان دہ بھی ثابت ہوسکتا ہے۔
اس حوالے سے ماہرین صحت کا کہنا ہے کہ بچوں اور بڑوں کے لیے یہ اچھا ہے کہ وہ رات بھر یا چند گھنٹوں کے لیے بھگوئے ہوئے بادام کو صبح کے پہلے کھانے کے طور پر استعمال کریں۔
لیکن ٹھہریے !! کیا آپ جانتے ہیں کہ بچوں اور بڑوں کو روزانہ کتنے بادام کھانے چاہئیں؟ زیر نظر مضمون میں ماہرین صحت نے بتایا ہے کہ عمر کے حساب سے روزانہ کتنے بادام کھانے چاہئیے اور زیادہ بادام کھانے سے کس قسم کے مسائل پیدا ہوسکتے ہیں۔
بھارتی میڈیا رپورٹ کے مطابق ماہرین صحت کا کہنا ہے کہ بچوں اور بڑوں کے لیے یہ اچھا ہے کہ وہ بادام اور کچھ دوسرے خشک میوہ جات اور بیجوں کو رات بھر یا چند گھنٹوں کے لیے صبح کے پہلے کھانے کے طور پر استعمال کریں۔
بھگوئے ہوئے بادام کھانے سے یادداشت اور سیکھنے کی صلاحیت بہتر ہوتی ہے۔ بادام میں موجود آئرن، میگنیشیم، کیلشیم، فاسفورس، پوٹاشیم، وٹامن ای صحت کے لیے بہت فائدہ مند ہے۔
سال 2017میں ‘ڈرمیٹولوجی ریسرچ اینڈ پریکٹس جرنل’ میں شائع ہونے والی رپورٹ کے مطابق محققین نے پایا ہے کہ بادام کھانے سے جھریوں میں کمی آتی ہے۔
روزانہ کتنے بادام کھانے چاہئیں؟
ماہرین کا کہنا ہے کہ صحت مند رہنے کے لیے بالغ افراد روزانہ 20 بادام تک کھا سکتے ہیں۔ کہا جاتا ہے کہ انہیں صبح ناشتے سے پہلے، پہلے کھانے کے طور پر استعمال کرنے سے اچھے نتائج ملتے ہیں۔
ماہرین نے تجویز کیا ہے کہ چھوٹے بچوں (1-3 سال کی عمر کے درمیان) کو روزانہ 3 سے 5 بادام کھلائے جائیں۔ اگر 9 سے 18 سال کی عمر کے افراد روزانہ 10 بادام کھائیں تو وہ صحت مند رہیں گے۔
زیادہ بادام کھانے کے مضر اثرات :
یہ بات بھی یاد رکھیں کہ روزانہ زیادہ بادام کھانے سے جسم میں بہت سے مسائل پیدا ہوسکتے ہیں جن میں وزن میں اضافہ، قبض، گردے کی پتھری اور دیگر امراض شامل ہیں۔
