کراچی: 2017 سے گمشدہ شہری کی بازیابی سے متعلق کیس میں عدالت نے پولیس افسر کو جھاڑ پلا دی، اور شہری کے حوالے سے اہم ہدایات جاری کر دیں۔
تفصیلات کے مطابق سندھ ہائیکورٹ میں 2017 سے لاپتا شہری کی بازیابی سے متعلق درخواست پر سماعت ہوئی، وکیل نے عدالت کو بتایا کہ محمد یوسف تھانہ سائٹ بی ایریا کی حدود سے گم ہوا، گمشدہ شہری کے 3 بچے ہیں اور کوئی کمانے والا نہیں ہے۔
تفتیشی افسر نے عدالت کو بتایا کہ گمشدہ محمد یوسف کے خلاف 3 مقدمات درج ہیں، لیکن عدالت نے آئی او سے استفسار کیا کہ آپ کے پولیس رولز کیا کہتے ہیں، کبھی پڑھتے ہیں؟ عدالت نے تفتیشی افسر کو جھاڑ پلاتے ہوئے کہا کبھی زحمت بھی کی پولیس رولز پڑھنے کی؟
جج نے کہا گمشدہ شہری اگر ملزم ہے تو اسے ڈھونڈ کر گرفتار کیا جائے، شہری کا خاندان بھی کہہ رہا ہے کہ اگر کسی نے قتل کر دیا ہے تو لاش تو ملے، عدالت نے 2018 میں ججمنٹ دی تھی کہ ملزمان کا ڈیٹا ویب سائٹ یا ایپ پر رکھا جائے۔
جج نے کہا کہ ملزم مارا گیا ہو یا گرفتار ہو تو اس سے متعلق معلومات ایپ پر ہونی چاہئیں، عدالت نے پولیس کے تفتیشی افسر کو 2018 کی ججمنٹ کا جائزہ لینے کی ہدایت کی اور سیکریٹری سوشل ویلفیئر، سیکریٹری زکوٰۃ ویلفیئر و دیگر کو نوٹسز جاری کر دیے۔
سندھ ہائی کورٹ نے فریقین کو لاپتا شہری کے اہلخانہ کی مالی معاونت کا بھی حکم دیا، اور 15 دن میں عمل درآمد رپورٹ طلب کر لی۔
