اسلام آباد : تحریک انصاف کے احتجاج کے بعد بانی پی ٹی آئی کیخلاف وفاقی دارلحکومت میں مزید چودہ مقدمے درج ہونے کے بعد درج مقدمات کی تعداد 76 ہو گئی۔
تفصیلات کے مطابق اسلام آباد ہائی کورٹ نے بانی پی ٹی آئی کیخلاف مقدمات کی سماعت ہوئی، جسٹس ارباب محمد طاہر نے نورین نیازی کی درخواست پر سماعت کی۔
درخواست گزار وکلاء شاہینہ شہاب اورمرزا عاصم بیگ عدالت پیش ہوئے، بلوچستان میں درج مقدمات کی رپورٹ عدالت پیش کی گئی۔
رپورٹ میں بتایا گیا کہ پی ٹی آئی احتجاج کے بعد بانی پی ٹی آئی کے خلاف اسلام آباد میں مزید 14 مقدمات درج کر لیے گئے۔
اسلام آباد پولیس کی جانب سے عمران خان کے خلاف مقدمات کی نئی رپورٹ بھی عدالت میں جمع کرادی گئی۔
اس سے قبل پولیس رپورٹ کے مطابق عمران خان کے خلاف اسلام آباد میں 62 مقدمات درج تھے، وکیل درخواست گزار نے کہا اسلام آباد کی کچھ ایف آئی آر سیل ہیں۔
جس پر عدالت نے کہا ان کے پاس پولیس رولز کے اختیارات ہیں، جوڈیشل مجسٹریٹ کو درخواست دیں۔
اسلام آباد ہائیکورٹ نے بانی پی ٹی آئی کے خلاف درج مقدمات کے حصول کی درخواست نمٹا دی ، بانی پی ٹی آئی کی بہن نورین نیازی نے مقدمات کی تفصیلات کیلئے درخواست دائر کی تھی۔
