راولپنڈی : عسکری قیادت نے 53 ویں یوم شہادت پر میجرشبیرشریف شہید نشان حیدر کو شاندار خراج عقیدت پیش کیا اور کہا میجر شبیرکی جرات، لگن اور قربانی حب الوطنی اور عسکری مہارت کی اعلیٰ ترین مثال ہے۔
پاک فوج کے شعبہ تعلقات عامہ (آئی ایس پی آر) کی جانب سے بیان میں کہا کہ میجر شبیر شریف شہید نشان حیدر کا تریپن واں یوم شہادت آج منایا جارہا ہے، اس موقع پر چیئرمین جوائنٹ چیفس آف اسٹاف کمیٹی، سروسز چیفس اور افواج پاکستان نے پیغام جاری کیا۔
عسکری قیادت نے اپنے پیغام میں شہید کو شاندار خراج عقیدت پیش کرتے ہوئے کہا میجر شبیر شریف کو انیس سو پینسٹھ کی جنگ میں بہادری پر ستارہ جرات سے نوازا گیا تھا۔
ترجمان کا کہنا تھا کہ انیس سواکہترکی جنگ میں ان کوسلیمانکی ہیڈ ورکس کے اہم اسٹریٹجک مقام کو محفوظ بنانے کا کام سونپا گیا، انھوں نے چار جاٹ رجمنٹ کے کمپنی کمانڈر میجرنارائن سنگھ کا صفایا کیا تھا۔
آئی ایس پی آر کا کہنا تھا کہ میجر شہید چھے دسمبر کو بہادری سے بار بار دشمن کے جوابی حملوں کو پسپا کرتے رہے اور مؤثر حکمت عملی سے دشمن کے ٹینکوں کو پیچھے ہٹنے پر مجبورکر دیا، انھوں نے بھارتی ٹینک کے گولے کا نشانہ بن کر جام شہادت نوش کیا۔
ترجمان نے مزید کہا کہ میجر شبیر کی جرات، لگن اور قربانی حب الوطنی، عسکری مہارت کی اعلیٰ ترین مثال ہے، انھوں نے بہادری سے تمام مشکلات کا سامنا کر کے تاریخ رقم کی، قوم مادر وطن کا دفاع کرنے والے بہادر ہیروز کو سلام پیش کرتی ہے۔
