کراچی کے علاقے کیماڑی میں شادی کی تقریب میں فائرنگ سے بچہ جاں بحق ہوگیا۔
اے آر وائی نیوز کے مطابق کراچی کے علاقے کیماڑی گلشن سکندر آباد میں شادی کی تقریب میں فائرنگ کی گئی جس کے نتیجے میں 13سالہ بچہ جاں بحق اور 2 افراد زخمی ہوگئے جنہیں طبی امداد کے لیے اسپتال منتقل کردیا گیا ہے جہاں ایک کی حالت تشویش ناک بتائی گئی ہے۔
پولیس کا کہنا ہے کہ واقعے کے بعد دولہا، والد سمیت فرار ہوگیا جس شخص نے شادی میں فائرنگ کی اطلاع دی تھی اس کی نشاندہی ہوگئی ہے۔
ایس ایس پی کیماڑی فیضان علی کا کہنا ہے کہ جاں بحق بچے اور زخمیوں کا تعلق دولہے کے خاندان سے ہے۔
انہوں نے کہا کہ پولیس نے موقع پر پہنچ کر تین افراد کو گرفتار کیا ہے، دولہا اور دلہن والے دونوں کا تعلق ایک ہی برادری سے ہے۔
پولیس حکام کا کہنا ہے کہ متاثرین پولیس کے ساتھ تعاون نہیں کررہے، مرکزی ملزم کی تلاش جاری ہے۔
