کراچی: تیرہویں سارک ای این ٹی کانگریس میں بھارت سے 5 ماہرین صحت شرکت کے لیے پاکستان پہنچ گئے۔
سارک ای این ٹی کانگریس 6 سے 8 دسمبر تک جاری رہے گی، بھارت سے کراچی آئے ماہرین صحت نے پاکستان کو بھارتی شہریوں کے لیے محفوظ قرار دے دیا۔
بھارتی پروفیسر کے پی موروانی نے کہا کہ پاکستان اتنا ہی محفوظ ہے جتنا بھارت کا کوئی اور شہر، پاکستانی اتنی مہمان نوازی کرتے ہیں کہ شرمندگی ہوتی ہے۔ پروفیسرکے پی موروانی کا مزید کہنا تھا کہ ان کے والدین سندھ سے ہجرت کر کے بھارت گئے تھے، آج اپنی جنم بھومی پر واپس آئے ہیں۔
پروفیسر پاٹل نے کہا کہ سال 2006 میں ڈیڑھ گھنٹے میں ممبئی سے کراچی آ گئے تھے، اس بار ممبئی سے کراچی بحرین کے راستے آنے میں 12 گھنٹے لگے۔ ای این ٹی پروفیسر تنیجا کا کہنا تھا کہ پاکستان آ کر اردو بولنے اور سننے سے کان سیراب ہو رہے ہیں۔
بھارتی ماہرین صحت نے کہا کہ پاکستان اور بھارت کے عوام اور ماہرین کے ملنے کے مواقع بڑھائے جانے چاہیئں، اس موقع پر آرگنائزنگ سیکریٹری سارک ای این ٹی کانگریس پروفیسر سمیر قریشی نے کہا کہ اس کانگریس میں افغانستان سمیت سارک ممالک اور دنیا بھر سے 30 غیر ملکی مندوبین شامل ہیں۔
