آئی ٹی ایکسپرٹ عرفان ملک کا کہنا ہے کہ ورچوئل پرائیویٹ نیٹ ورک (وی پی این) رجسٹرد کروایا لیکن اب لاگ ان نہیں ہورہا۔
اے آر وائی نیوز کے پروگرام ’سوال یہ ہے‘ میں گفتگو کرتے ہوئے آئی ٹی ایکسپرٹ عرفان ملک نے کہا کہ دو ہفتے ہوگئے ہیں آج بھی وی پی این لاگ ان نہیں ہورہا ہے، حکومت کہہ رہی ہے رجسٹریشن کروالیں لیکن رجسٹریشن روک رکھی ہے۔
انہوں نے کہا کہ اس حالات میں کیسے کاروبار کریں کیسے کلائنٹ کو منائیں۔
آئی ٹی ایکسپرٹ نے کہا کہ ایک کلائنٹ کا اعتماد حاصل کرنے کے لیے پانچ، پانچ سال لگ جاتے ہیں، جو کلائنٹ واپس جارہے ہیں اب وہ دوبارہ کبھی کال نہیں کریں گے۔
عرفان ملک نے کہا کہ رکاوٹوں کی وجہ سے 48 گھنٹے میں ایک ہزار خاندان بے روزگار ہوئے ہیں، وی پی این کی لسٹ جاری کرنی چاہیے کہ اس پر کاروبار کرسکتے ہیں۔
یہ پڑھیں: پی ٹی اے نے موبائل نمبر کے ذریعے وی پی این رجسٹریشن کی سہولت متعارف کرا دی
واضح رہے کہ آج پاکستان ٹیلی کمیونیکیشن اتھارٹی (پی ٹی اے) نے موبائل نمبرز کے ذریعے ورچوئل پرائیویٹ نیٹ ورک (وی پی این) کی رجسٹریشن متعارف کرا دی۔
پی ٹی اے کا کہنا ہے کہ اسٹیٹک آئی پی ایڈریس نہ رکھنے والے فری لانسرز موبائل نمبر کے ذریعے رجسٹریشن کرا سکیں گے، فری لانسرز موبائل ڈیٹا کنیکشن پر وی پی این استعمال کرنے کیلئے موبائل نمبر رجسٹر کرا سکتے ہیں۔
پی ٹی اے کے مطابق اب تک 31 ہزار سے زائد وی پی این رجسٹر کیے جا چکے ہیں، اقدام آئی ٹی شعبے کی ترویج اور وی پی این رجسٹریشن آسان بنانے کے لیے کیا گیا ہے۔
وی پی این کیا ہے؟
وی پی این سے آپ کو پبلک نیٹ ورکس استعمال کرتے ہوئے ایک محفوظ نیٹ ورک کنکشن قائم کرنے میں مدد ملتی ہے۔
وی پی این سے آپ کا انٹرنیٹ ٹریفک انکرپٹ ہو جاتا ہے اور آپ کی آن لائن شناخت چھپ جاتی ہے۔
آسان الفاظ میں وی پی این استعمال کرنے پر تھرڈ پارٹیز کے لیے آپ کی آن لائن سرگرمیوں کو ٹریک کرنا یا ڈیٹا چرانا بہت مشکل ہو جاتا ہے۔
