بھارتی ریاست پنجاب میں بارات لانے والے دولہے کو اُس وقت دھچکا لگا جب اسے دلہن ملی اور نہ ہی وہ شادی ہال ملا جس میں تقریب ہونی تھی۔
انڈین میڈیا کی رپورٹس کے مطابق پولیس نے بتایا کہ 24 سالہ دیپک کمار شادی کرنے کیلیے دبئی سے پنجاب پہنچا، اس کی تین سال قبل منپریت سے انسٹاگرام پر دوستی ہوئی تھی، لیکن دونوں نے کبھی ملاقات نہیں کی۔
دیپک کمار شادی کیلیے ایک ماہ قبل دبئی سے واپس آیا تھا۔ اس نے منپریت کے اہل خانہ کے ساتھ فون کالز پر بات چیت کے ذریعے شادی طے کی تھی۔
شادی کے دن دیپک کمار نے بارات کے ساتھ موگا کا سفر طے کیا جہاں دلہن والوں نے شادی ہال بُک کروایا تھا، لیکن جب یہ لوگ وہاں پہنچے تو حقیقت کھل کر سامنے آگئی۔
دیپک کمار کے اہل خانہ نے جب ’روز گارڈن پیلس‘ شادی ہال کے بارے میں پوچھا تو لوگوں نے بتایا کہ موگا میں ایسی کوئی جگہ نہیں۔
متاثرہ دولہے نے بتایا کہ منپریت کے ساتھ صرف انسٹاگرام پر ہی بات چیت ہوتی تھی اور ہماری کبھی ملاقات نہیں ہوئی، لڑکی کے والدین نے فون پر شادی طے کی تھی اور تقریب کیلیے 50 ہزار روپے بھی مانگے تھے جو میں نے ادا کر دیے تھے۔
دیپک کمار کے والد پریم چند نے کہا کہ انہوں نے ٹیکسیاں کرایہ پر لی تھیں، کیٹرنگ کا انتظام کیا تھا اور تقریب کیلیے ایک ویڈیو گرافر بک کروایا تھا۔
پولیس نے دیپک کمار کی شکایت پر لڑکی والوں کے خلاف مقدمہ درج کر کے معاملے کی مزید انکوائری شروع کر دی۔
