بنگلہ دیش کی عبوری حکومت کے سربراہ محمد یونس نے ملک میں ہندوؤں پر حملوں کو پروپیگنڈا اور بھارتی حکومت کی تشویش کو غلط قرار دیا ہے۔
محمد یونس نے بنگلہ دیش میں رہنے والے ہندوؤں پر حملوں کو پروپیگنڈے سے تشبیح دی، انھوں نے کہا کہ بھارتی حکومت ہندوؤں کے تحفظ کے حوالے سے جس تشویش کا اظہار کر رہی ہے وہ حقائق پر مبنی نہیں ہیں، ہندوؤں کے حوالے سے جو کچھ کہا جا رہا ہے وہ صرف ’پروپیگنڈا‘ ہے۔
چیف ایڈوائزر نے سابق وزیراعظم شیخ حسینہ پر بڑا الزام لگاتے ہوئے کہا کہ شیخ حسینہ نے سب کچھ برباد کر دیا ہے، بنگلہ دیش میں انتخابی اصلاحات کے بعد ہی انتخابات ہوں گے۔
انھوں نے کہا کہ انٹرنیشنل کرائم ٹربیونل میں ٹرائل ختم ہونے کے بعد وہ شیخ حسینہ کی بھارت سے حوالگی کی بات کریں گے، بین الاقوامی قانون کے تحت بھارت ان کی حوالگی کا پابند ہے۔
انٹرویو کے دوران ملک کے عبوری سربراہ نے کہا کہ یہاں اصلاحات پر عمل درآمد میں وقت لگے گا کیونکہ ہم بنگلہ دیش کو نئے سرے سے تعمیر کر رہے ہیں،عبوری حکومت نے انتخابی نظام، آئین اور عدلیہ میں اصلاحات کے لیے کئی کمیشن بنائے ہیں۔
انھوں نے کہا کہ 15 سالہ دور میں بنگلہ دیش میں شیخ حسینہ نے سب کچھ برباد کردیا، انتظامی ڈھانچہ مکمل طور پر تباہ ہو چکا ہے۔
محمد یونس نے کہا کہ شیخ حسینہ نے جعلی انتخابات کرائے اور خود کو اور ان کی پارٹی کو بلامقابلہ فاتح قرار دیا، شیخ حسینہ نے ایک فاشسٹ حکمران کے طور پر حکومت کی۔
