53 سال قبل آج ہی کے دن 9 دسمبر کو پاک بحریہ نے بھارت کے جہاز کُکری کو سمندر برد کر کے تاریخ رقم کی تھی۔
9 دسمبر کا دن پاکستان کی عسکری تاریخ میں ہمیشہ یادگار رہے گا کیونکہ 53 برس قبل 1971 میں آج ہی کے دن پاک بحریہ نے بھارت کے جہاز کُکری کو سمندر بُرد اور جنگی جہاز کرپان کو مفلوج کر کے تاریخ رقم کی تھی۔
یہ کارناہ اس لیے بھی تاریخی ہے کہ جنگ عظیم دوم کے بعد کسی بھی آبدوز سے جنگی جہاز کو غرق کرنے کا پہلا اور روایتی آبدوز کے ذریعے تباہ کرنے کا اب تک واحد واقعہ ہے۔
53 ویں ہنگور ڈے کے موقع پر چیف آف دی نیول اسٹاف ایڈمرل نوید اشرف نے اپنے جاری پیغام میں کہا ہے کہ یہ دن ہمیں ہنگور کے عملے کی بہادری، استقامت اور جذبے کی یاد دلاتا ہے۔ ہنگور نے پاک بحریہ کے لیے جو کارنامہ سرانجام دیا وہ اللہ تعالیٰ کے خاص کرم، تجربہ کار عملے کی پیشہ وارانہ مہارت اور پاکستان کے ساتھ بیلوث عقیدت کی اعلیٰ ترین مثال ہے۔
ان کا کہنا تھا کہ آج کا دن ہمیں یہ باور کرواتا ہے کہ پیشہ وارانہ مہارت اور لگن کے ذریعے ہم تمام مشکلات کا مقابلہ کر سکتے ہیں، اپنے قابل فخر ماضی اور پیشہ وارانہ ورثے کو موجودہ دور کے جدید تقاضوں کے مطابق مزید تقویت دے سکتے ہیں۔
نیول چیف ایڈمرل نوید اشرف کہتے ہیں کہ پاک بحریہ نے ہمیشہ اپنی سب میرین فورس پر خصوصی توجہ دی ہے اور چین کے تعاون سے جاری آبدوز کا منصوبہ اس بات کا منہ بولتا ثبوت ہے۔ 8 ہنگور کلاس آبدوزوں کے اضافے سے پاک بحریہ کی جنگی صلاحیتوں اور اس کی جارحیت کو تقویت ملے گی۔
ان کا کہنا تھا کہ ہم پاک بحریہ کی آبدوز غازی کے شہدا کو فراموش نہیں کر سکتے۔ آبدوز غازی نے 1971 میں مادر وطن کے دفاع میں اپنی جانیں نچھاور کیں۔ مجھے پختہ یقین ہے کہ پاکستان بحریہ کا سب میرین اسکواڈرن اپنے شہداء اور غازیوں کی قربانیوں اور ہنگور کے مثالی کارنامے سے متاثر ہوتا رہے گا۔
