وزیرِ اعلیٰ پنجاب مریم نواز کا کہنا ہے کہ حکومت پنجاب شنگھائی کے حکام کے ساتھ آئی ٹی سیکٹر کو فروغ دینے کے لیے پوری طرح تیار ہے۔
تفصیلات کے مطابق وزیراعلیٰ پنجاب مریم نواز کا دورہ چین جاری ہے جہاں ان سے کمیونسٹ پارٹی آف چائنا کی شنگھائی کمیٹی کے ڈپٹی سیکریٹری زؤ زونگ منگ نے ملاقات کی۔
مسٹر زؤ زونگ منگ نے وزیراعلیٰ پنجاب مریم نواز کا پُرتپاک خیر مقدم کیا، ملاقات میں ڈپٹی سیکریٹری زؤ زونگ منگ نے پنجاب اور شنگھائی کے درمیان معاشی تعلقات مزید مستحکم کرنے کے عزم اور تجارت، سرمایہ کاری، سائنس، ٹیکنالوجی، انڈسٹری میں تعاون کو مزید فروغ دینے کی ضرورت پر زور دیا۔
ملاقات میں معاشی اور ٹیکنالوجی کے شعبوں میں تعاون بڑھانے پر بھی تبادلہ خیال کیا گیا، اس موقعے پر مریم نواز نے پاکستانی طلبہ، ماہرین کو ٹریننگ اور تعلیم کے مواقع فراہم کرنے پر شکریہ ادا کیا اور شنگھائی بیسڈ کمپنیوں کو پنجاب کے اسپیشل اکنامک زونز میں سرمایہ کاری کی دعوت دی۔
اس موقعے پر مریم نواز نے کہا کہ شنگھائی کا فنانشل اور ٹریڈ حب کے طور پر ابھرنا قابل تحسین امر ہے، آٹو موبل، آئی ٹی سمیت دیگر شعبوں میں شنگھائی کی کمپنیوں سے اشتراک کار چاہتے ہیں۔
مریم نواز کا کہنا تھا کہ چینی تعاون سے پاکستان میں آئی ٹی انڈسٹری تیزی سے فروغ پارہی ہے، حکومت پنجاب شنگھائی حکام سے آئی ٹی سیکٹر کو فروغ دینے کیلئے پوری طرح تیار ہے۔
انہوں نے کہا کہ دونوں ملک نواز شریف اور شہباز شریف کے ادوار حکومت میں مزید قریب آئے اور اہل چین سے انس میرے خون میں شامل ہے، سیاسی ومعاشی عدم استحکام کے بعد معیشت بڑھوتری کی طرف گامزن ہیں، چین کی کمپنیوں کو سرمایہ کاری پر ترجیحاً سہولیات دی جائیں گی۔
دوسری جانب ڈپٹی سیکریٹری زؤ زونگ منگ نے کہا کہ تجارت، سرمایہ کاری، انفرا اسٹرکچر، عوامی رابطے اور باہمی تعلقات کو مزید مستحکم کریں گے۔
