افغانستان کے دارالحکومت کابل میں خودکش دھماکے کے نتیجے میں وزیر برائے مہاجرین خلیل حقانی جاں بحق ہوگئے۔
غیرملکی خبررساں ادارے کی رپورٹ کے مطابق کابل میں حملہ آور نے وزارت کے دفتر میں گھس کر خود کو دھماکے سے اڑا لیا جس کے نتیجے میں وزیر برائے مہاجرین خلیل حقانی جاں بحق ہوئے۔
خلیل الرحمان حقانی کے جاں بحق ہونے سے متعلق بھتیجے انس حقانی نے تصدیق کردی۔
ان کے علاوہ بھی مزید ہلاکتوں کا خدشہ ظاہر کیا گیا ہے۔
دوسری جانب افغان پریس ایجنسی خاما کے مطابق دھماکا خودکش تھا، واقعے کے وقت خلیل الرحمان حقانی مسجد کی جانب جارہے تھے۔
علم میں رہے کہ خلیل الرحمٰن حقانی جلال الدین حقانی کے بھائی تھے، جنہوں نے حقانی نیٹ ورک کی بنیاد رکھی تھی۔ وہ موجودہ وزیر داخلہ سراج الدین حقانی کے چچا بھی تھے۔
