کراچی : کراچی ایئر پورٹ پر سینیگال سے آنیوالے 5 مسافروں کو تحویل میں لے لیا گیا، مسافروں کی مذکورہ ایجنٹ سےفی کس 40 لاکھ روپے کی ڈیل ہوئی تھی۔
تفصیلات کے مطابق ایف آئی اے امیگریشن نے کراچی ایئر پورٹ پر کارروائی کرتے ہوئے سینیگال سے آنے والے 5 مسافروں کو تحویل میں لے لیا۔
ایف آئی اے نے بتایا کہ مسافر سینیگال سے فلائٹ نمبر ET- 694 کے ذریعے پاکستان پہنچے تھے، مسافروں میں قاسم، حماد فیاض، چوہدری بدر منیر ، عدنان علی اور ابو منان شامل ہیں۔
ابتدائی تفتیش میں کہا گیا کہ مسافروں کے لئے رضوان جٹ عرف جانی جٹ نامی ایجنٹ نے سفری دستاویزات اور دیگر سفری سہولیات فراہم کیں، مذکورہ ایجنٹ کو فی کس 40 لاکھ روپے ادا کرنے کی ڈیل کی گئی۔
ابتدائی تفتیش کے مطابق مسافروں نے فی کس 5 لاکھ روپے سفر شروع کرنے سے پہلے ادا کئے جبکہ 35 لاکھ فی کس اسپین پہنچنے پر ادا کرنے تھے۔
ایف آئی اے کا کہنا تھا کہ مسافر وزٹ ویزے پر سینیگال پہنچے ایجنٹ نے سینیگال سے یورپ بھجوانے کے لیے ویزہ مہیا کرنے کا وعدہ کیا تھا تاہم سینیگال میں طویل انتظار کے بعد بھی مسافروں کو ویزے مہیا نہیں کیے گئے۔
بعد ازاں ایجنٹ نے حماد فیاض نامی مسافر کو وٹس ایپ کے ذریعے پرتگال کا ریزیڈنٹ کارڈ بھیجا جو جعلی نکلا، ایجنٹ کے مشکوک ثابت ہونے پر مسافروں نے پاکستان واپسی اختیار کی، مسافروں کو ایجنٹوں کی نشاندہی اور مزید قانونی کاروائی کے لئے اینٹی ہیومن ٹریفکنگ سرکل کراچی کے حوالے کر دیا گیا ہے۔
