وزیراعظم شہباز شریف کی ہدایت پر پاکستانی وفد نے امریکی جیل میں قید ڈاکٹر عافیہ صدیقی سے تقریباً تین گھنٹے کی طویل ملاقات کی ہے۔
تفصیلات کے مطابق ڈاکٹر عافیہ صدیقی سے ملاقات میں پاکستانی وفد میں سینیٹر بشریٰ انجم، سینیٹر طلحہ محمود اور ماہر نفسیات ڈاکٹر اقبال آفریدی شامل ہیں۔
وزیراعظم شہبازشریف کی ہدایت پر جانے والے وفد نے واشنگٹن میں ارکان کانگریس اور محکمہ خارجہ کے حکام سے بھی عافیہ کی رہائی کیلئے ملاقاتیں کی اور امریکی صدر جوبائیڈن سے ڈاکٹر عافیہ کی رہائی کی اپیل کی۔
سینیٹر بشریٰ انجم، سینیٹر طلحہ محمود اور ماہر نفسیات ڈاکٹر اقبال آفریدی پر مشتمل وفد کا کہنا ہے کہ ملاقات تین گھنٹے جاری رہی جس میں ڈاکٹر عافیہ صدیقی نے دوران قید درپیش مشکلات سے آگاہ کیا۔
پاکستانی وفد کا مزید کہنا تھا کہ عافیہ صدیقی کا کیس عالمی سطح پر انسانی حقوق کا مسئلہ ہے، ڈاکٹر عافیہ نے ملاقات میں بتایا کہ انہیں اب بھی انصاف ملنے کی اُمید ہے۔
