پشاور: مدارس رجسٹریشن بل کے معاملے پر مولانا حسین احمد نے کہا ہے کہ ایوان صدر کے اعتراضات سے ثابت ہو گیا ہے کہ حکومت بیرونی دباؤ کا شکار ہے۔
اتحاد تنظیمات مدارس پاکستان کے صوبائی صدر مولانا حسین نے اے آر وائی نیوز سے گفتگو کرتے ہوئے کہا ’’عالمی مالیاتی ادارے کو دینی مدارس کو سہولتیں دینا برداشت نہیں، ایوان صدر کے اعتراضات سے ثابت ہو گیا حکومت بیرونی دباؤ کا شکار ہے۔‘‘
مولانا حسین احمد کا کہنا تھا ’’مدارس رجسٹریشن پر سمجھوتا نہیں ہوگا، مولانا طاہر اشرفی نے ہمارے مؤقف کی تائید کی ہے، حکومت نے ہمیں کوئی دوسرا بل یا مسودہ نہیں بلکہ انتظامی حکم دیا ہے۔‘‘
انھوں نے کہا 2019 کے انتظامی حکم کے مطابق ہمیں مدارس رجسٹریشن کا کہا جا رہا ہے، جب کہ ہمارا مطالبہ ہے کہ اسمبلیوں سے پاس شدہ قانون کے تحت مدراس کی رجسٹریشن ہو۔ مولانا حسین نے کہا کہ انتظامی حکم وقتی ہے، اس کے تحت مدراس کی رجسٹریشن نہیں ہونی چاہیے۔
مولانا حسین احمد نے بتایا کہ مدراس رجسٹریشن کے حوالے سے 16 دسمبر کو اسلام آباد میں اجلاس ہوگا۔ واضح رہے کہ اتحاد تنظیمات مدارس نے صدر مملکت آصف علی زرداری کا مدارس رجسٹریشن بل پر اعتراض مسترد کر دیا ہے۔
17 دسمبر کو مدارس رجسٹریشن بل کی منظوری کا امکان
ادھر ذرائع کا کہنا ہے کہ مدارس رجسٹریشن بل کے معاملے پر وفاقی حکومت اور جمعیت علمائے اسلام (ف) کے درمیان بیک ڈور رابطہ ہوا ہے۔ نئے بل پر حکومت اور جے یو آئی (ف) میں مشاورت جاری ہے، وزیر اعظم شہباز شریف نے پارلیمنٹ کا مشترکہ اجلاس بلانے کی ایڈوائس بھی صدر مملکت آصف علی زرداری کو بھیج دی۔ ذرائع کے مطابق اجلاس میں مدارس رجسٹریشن سمیت 8 بلوں کی منظوری کا امکان ہے۔
