ڈھاکا: بنگلادیش میں انتخابات کی تاریخوں کے حوالے سے محمد یونس کا ایک اہم اعلان سامنے آیا ہے۔
تفصیلات کے مطابق بنگلادیش کی عبوری حکومت کے رہنما محمد یونس نے اعلان کیا ہے کہ نئے انتخابات اگلے سال 2025 کے آخر یا پھر 2026 کے شروع میں ہوں گے۔
محمد یونس کا کہنا تھا کہ انتخابات کی تاریخیں 2025 کے آخر یا 2026 کی پہلی ششماہی تک فائنل کی جا سکتی ہیں، انتخابات کی ٹائم لائن مختلف سیاسی جماعتوں کے درمیان ہونے والے معاہدوں پر منحصر ہوگی۔
ٹی وی انٹرویو میں 73 سالہ محمد یونس نے کہا کہ انتخابات کے انتظامات سے پہلے اصلاحات ہونی چاہئیں، اگر سیاسی جماعتیں کچھ بنیادی اصلاحات کے ساتھ قبل از وقت انتخابات کرانے پر راضی ہو جاتی ہیں، جیسے کہ ووٹر لسٹ کی درستگی کو یقینی بنانا تو انتخابات نومبر کے آخر میں ہی ہو سکتے ہیں۔
ان کا کہنا تھا کہ اگر انتخابی اصلاحات کمیشن کی سفارشات اور قومی اتفاق رائے کی بنیاد پر جامع اصلاحات نافذ کی جاتی ہیں، تو اس کے لیے مزید 6 ماہ کا وقت درکار ہو سکتا ہے۔
ملک کے عبوری رہنما محمد یونس نے یہ اعلان 16 دسمبر 2024 کو قوم سے اپنے خطاب کے دوران کیا، جو جولائی اگست کی بغاوت کے بعد پہلے یوم فتح کے موقع پر تھا، اس بغاوت نے معزول وزیر اعظم شیخ حسینہ کی 16 سالہ حکومت کا خاتمہ کیا تھا۔
ڈاکٹر یونس نے مشرقی تیمور کے صدر، نوبل امن انعام یافتہ ہوزے راموس ہورٹا کا بھی خیرمقدم کیا، جو یوم فتح کی تقریبات میں شامل ہونے کے لیے ڈھاکا پہنچے تھے۔ ڈاکٹر یونس نے کہا کہ راموس ہورٹا نے بنگلادیش کی جنگ آزادی سے متاثر ہو کر اپنے ملک کی آزادی کی جدوجہد کی قیادت کی تھی۔ مشرقی تیمور نے 2002 میں آزادی حاصل کی تھی۔
