سعودی عرب میں تعمیراتی کام تیزی سے جاری ہے، اس سلسلے میں مملکت ایک ایشیائی ملک کے ملازمین کیلئے روزانہ 6 ہزار ویزے جاری کرہی ہے۔
سبق ویب سائٹ کے مطابق سعودی عرب میں بنگلہ دیش سے تعلق رکھنے والے کارکنوں کے لیے روزانہ کی بنیاد پر 4 ہزار سے 6 ہزار ویزوں کا اجرا کیا جارہا ہے، گزشتہ ماہ سعودی عرب میں 83 ہزار کے قریب بنگلہ دیشی کارکنوں کو ملازمت دی گئی ہے۔
اتنی بڑی تعداد میں دنیا کے کسی اور ملک کے ملازمین کو گزشتہ 35 ماہ کے دوران ملازمت نہیں دی گئی، سعودی عرب نے ایشیائی ممالک میں بالخصوص بنگلہ دیشی کارکنان کو ترجیح دی ہے۔
اتنی بڑی تعدد میں غیرملکیوں کو ملازمت دینے کی ایک وجہ یہ بھی ہے کہ سعودی وژن 2030 کے تحت ملک میں کئی میگا پروجیکٹ پر کام ہو رہا ہے۔
اس کے علاوہ سعودیہ کو فیفا ورلڈ کپ 2034 کی میزبانی بھی مل چکی ہے اور ملک میں نئے فٹبال اسٹیڈیمز کی تعمیر کا بھی امکان ہے جبکہ 2030 میں ہونے والے ایکسپو کے لیے بھی سعودی عرب میں تیاریاں ہورہی ہیں۔
مملکت میں روڈ اور ریلوے لائن کا جال بھی بچھایا جارہا ہے جبکہ سعودی حکام اپنے شہریوں کے بنیادی ڈھانچے پربھی کام کررہے ہیں اور اسے اپ گریڈ کررہے ہیں۔
جتنے بڑے پیمانے پر سعودی عرب میں تعمیراتی کام جاری ہے انہی منصبوں کو بروقت مکمل کرنے کے لیے سعودی ہزاروں کارکنوں کی ضرورت ہے، جس کے تحت بنگلہ دیشی ملازمین کو بڑی تعداد میں ویزے جاری کیے گئے ہیں۔
