ملک بھر کی طرح کراچی میں بھی انسداد پولیو مہم جاری ہے، پولیس نے مہم کے دوران بچوں کو پولیو قطرے پلانے سے انکار کرنے والے دو ملزمان کو گرفتار کرلیا۔
اے آر وائی نیوز کی رپورٹ کے مطابق کراچی کے شہریوں کا اپنے بچوں کو پولیو کے قطرے پلانے سے انکار کرنا مہنگا پڑگیا، حوالات پہنچا دیئے گئے۔
2شہریوں کیخلاف کار سرکار میں مداخلت اور دیگر دفعات کے تحت مقدمہ درج کرلیا گیا ہے۔
دونوں ملزمان کے خلاف مقدمہ ناظم آباد تھانے میں درج کیا گیا، مقدمے میں نامزد مکان مالک سعد اشرف اور ملازم شان کو گرفتار کرلیا گیا۔
یاد رہے کہ ملک میں پولیو وائرس کے پھیلاؤ میں مسلسل اضافہ ہو رہا ہے۔ مذکورہ انسداد پولیو مہم رواں برس کی آخری مہم ہے۔ اس مہم کے دوران ملک بھر کے 45 ملین بچوں کو پولیو سے بچاؤ کے قطرے پلائے جائیں گے۔
عالمی ادارہ صحت (ڈبلیو ایچ او) کے مطابق پاکستان اور افغانستان دنیا کے وہ واحد ممالک ہیں، جہاں اب تک ممکنہ طور پر انسانوں کے لیے مہلک اور انہیں زندگی بھر کے لیے مفلوج کر دینے والے پولیو وائرس کا مکمل طور پر خاتمہ نہیں کیا جاسکا۔
