ہونولولو/بیونس آئرس: امریکا اور ارجنٹائن میں طیارے گرنے کے خوفناک واقعات پیش آئے ہیں جن میں 4 افراد ہلاک ہو گئے۔
امریکی ریاست ہوائی میں تربیتی طیارہ گرنے سے 2 افراد ہلاک ہوئے، جب کہ ارجنٹائن میں طیارہ رہائشی علاقے میں گر کر تباہ ہوا، جس میں پائلٹ سمیت 2 افراد جان سے گئے، طیارہ گرنے سے گاڑیوں اور مکانات کو بھی نقصان پہنچا۔
ریاست ہوائی میں واقعہ منگل کی سہ پہر کو پیش آیا، ہوائی کے محکمہ ٹرانسپورٹیشن کے مطابق چھوٹا طیارہ ڈینیئل کے انوئے انٹرنیشنل ایئرپورٹ کے قریب گر کر تباہ ہوا۔ اے بی سی نیوز کے مطابق طیارہ تربیتی پرواز پر تھا، ٹیک آف کے فوراً بعد پائلٹ نے کنٹرول کھو دیا۔
ڈیش کیم ویڈیو میں ریکارڈ منظر کے مطابق جہاز گرنے سے پہلے تیزی سے نیچے کی طرف جھک گیا تھا، ایئر ٹریفک کنٹرول ٹاور سے بات کرتے ہوئے پائلٹ نے کہا کہ طیارہ کنٹرول سے باہر ہو گیا ہے اور وہ اترنے کے لیے جگہ تلاش کر رہا ہے، ٹاور سے پائلٹ کو اترنے کی کوشش کرنے کی ہدایت کی گئی لیکن وہ ناکام رہا۔
چھوٹا طیارہ ایک ایسی خالی عمارت سے ٹکرا گیا، جسے پہلے ہی مسمار کرنے کا منصوبہ تھا۔ عینی شاہدین کے مطابق حادثے کے وقت ایک زوردار دھماکا سنائی دیا۔ اس حادثے میں ہلاک ہونے والے کی عمر 22 سال تھی، اور وہ اپنے پائلٹ لائسنس کے لیے گریجویٹ ٹریننگ پر تھا۔
ویڈیو: ممبئی میں سیاحوں کی کشتی کو خوفناک حادثہ
دوسرا واقع گزشتہ روز 18 دسمبر کو ارجنٹائن میں پیش آیا، بیونس آئرس کے سان فرنینڈو ایئرپورٹ پر لینڈنگ کرنے والا طیارہ رن وے سے گزر کر ایک مکان سے ٹکرا گیا۔ رپورٹس کے مطابق طیارہ مقامی وقت کے مطابق دوپہر کے قریب زمین پر آنے کے بعد کنٹرول کھو بیٹھا تھا۔
جیٹ نے پھر رفتار بڑھانے اور دوبارہ ٹیک آف کرنے کی کوشش کی، لیکن اس کی بجائے وہ رن وے سے نکل گیا اور زوردار طریقے سے ایک مکان سے ٹکرا گیا۔ جس سے طیارے میں آگ بھڑک اٹھی، اور پائلٹ اور کو پائلٹ ہلاک ہو گئے۔
