وفاقی وزیر دفاع خواجہ آصف کا کہنا ہے کہ پاکستان میں کرپشن 50 فیصد بھی کم ہوجائے تو کسی آئی ایم ایف کی ضرورت نہیں ہوگی۔
تفصیلات کے مطابق سیالکوٹ چیمبرز آف کامرس میں صنعت کاروں سے ملاقات کے بعد نیوز کانفرنس کرتے ہوئے خواجہ آصف نے کہا کہ کرپشن کو 100 فیصد ختم کرنے کا تصور بھی نہیں کیا جاسکتا۔
انہوں نے کہا کہ کرپشن ہمارے ملک کو دیمک کی طرح کھارہی ہے، کسٹم کلکٹر 40،50 کروڑ روپے رشوت لیتے ہیں، حلال اور حرام کی تمیز ختم ہوچکی ہے، اللہ ہم سب کو رزق حلال کمانے کی توفیق دے۔
خواجہ آصف نے کہا کہ ملک کو کرپشن کی بیماری کا سامنا ہے، پرویزالہٰی نے مجھے بتایا ایک بیوروکریٹ نے شادی کی سلامی میں 4 ارب کمائے، ہمیں ملک کے اندر استحکام کی ضرورت ہے۔
ان کا کہنا تھا کہ ایک کنٹینر کو آپریٹ کرنے کے لئے 6 گھنٹے کا وقت درکار ہوتا ہے، کسی گاڑی کو ٹریک کرنے کے لیے ٹریکر لگایا جاتا ہے، وہ ٹریکر اتار کر دوسری گاڑی میں لگا دیا جاتا ہے، اصل گاڑی کہیں اور بھیج دی جاتی ہے۔
وزیر دفاع خواجہ آصف نے مزید کہا کہ ملک کی معیشت مثبت سمت میں جاری ہے، وقت کے ساتھ ساتھ مسائل حل ہوجائیں گے، ہم صنعتکاروں کے مسائل سمجھتے ہیں، ہم چاہتے ہیں ان سے قریبی رابطہ رکھا جائے، حکومت صنعتوں کے مسائل حل کرنے کے لیے سنجیدہ ہے۔
