کراچی: وزیر اطلاعات سندھ شرجیل انعام میمن کا کہنا ہے کہ ڈمپرز کو شہر میں بند کردینا مسئلے کا حل نہیں، ٹریفک قوانین پر عملدرآمد کرنا ہوگا۔
اے آر وائی نیوز سے گفتگو کرتے ہوئے وزیر اطلاعات سندھ شرجیل میمن نے کہا کہ ٹریفک قوانین کی خلاف ورزی پر سزائیں برھانا ہوں گی، لوگ ٹریفک قوانین کو سنجیدہ نہیں لیتے ہیں، یہی لوگ بیرون ملک جاتے ہیں تو بہترین ڈرائیونگ کرتے ہیں، پاکستان میں ہر آدمی خود کو ٹریفک قوانین سے بالاتر سمجھتا ہے۔
انہوں نے کہا کہ اگر ڈمپرز کو شہر میں بند کریں گے تو پھر واٹر ٹینکرز والے بھی موجود ہیں۔
شرجیل میمن کا کنا ہے کہ شہر میں ترقیاتی کام بھی چل رہے ہیں، سڑکیں بھی بن رہی ہیں، ڈمپرز سے متعلق وقت کی پابندی کرنا ہوگی۔
صوبائی وزیر نے اعتراف کیا کہ کراچی میں ہیوی ٹریفک کی روک تھام میں مسائل ہیں تاہم ان کا کہنا ہے کہ ہمیں نزلہ ٹریفک پولیس پر بھی نہیں گرانا چاہیے، وہ بھی گرمی، سردی میں ٹریفک کنٹرول کررہے ہوتے ہیں۔
انہوں نے کہا کہ سندھ حکومت بھی چاہتی ہے کہ ٹریفک حادثات نہ ہوں، کسی بھی حکومت اور کسی بھی جماعت نے ٹریفک مسائل کو حل نہیں کیا، گاڑیوں کے فٹنس اور فٹنس اور کم عمر ڈرائیورز کے بھی مسائل ہیں۔
واضح رہے کہ کراچی کے مختلف علاقوں میں 24 گھنٹوں کے دوران ٹریفک حادثات میں بچے سمیت 5 افراد جاں بحق ہوگئے۔
پولیس کے مطابق بھینس کالونی میں ایک بچہ ٹرک کی ٹکر سے جاں بجق ہوا۔ آئی سی آئی پل پر ڈمپر کی ٹکر سے موٹرسائیکل سوار شخص جاں بحق ہوا۔
پولیس کے مطابق منگھوپیر نادرن بائی پاس پر ٹرک اور گاڑی کی ٹکر سے 2 افراد جاں بحق ہوئے۔ بلدیہ حب ریور روڈ پر بھی ڈمپر کی ٹکر سے ایک شخص جاں بحق ہوا۔
