لاہور: پنجاب کے مختلف علاقوں میں شدید دھند کے باعث موٹر وے کو متعدد مقامات پر بند کردیا گیا ہے، موٹر وے پولیس نے عوام سے حفاظتی تدابیر اختیار کرنے کا کہا ہے۔
اے آر وائی نیوز کے مطابق پنجاب موٹر وے پولیس کے ترجمان کا کہنا ہے کہ موٹروے ایم 2 لاہور سے خانقاہ ڈوگرہ تک جبکہ موٹروے ایم 3 لاہور سے رجانہ تک دھند کے باعث بند ہے۔
اس کے علاوہ لاہور سیالکوٹ موٹروے کو دھند کی وجہ سے بند کردیا گیا ہے، جبکہ موٹروے ایم 4 گوجرہ سے فیصل آباد تک دھند کے باعث بند ہے۔
ترجمان موٹروے پولیس کے مطابق موٹر ویز بند کرنے کا مقصد حادثات سے بچاؤ اور موٹروے استعمال کرنے والوں کے جان و مال کا تحفظ ہے، شہریوں سے درخواست ہے کہ دھند کہ اوقات میں غیر ضروری سفر سے گریز کریں۔
اپنا سفر دن کی روشنی میں مکمل کر کے دھند کے آغاز سے پہلے اپنے منزل مقصود تک پہنچ جائیں – گاڑیوں میں فوگ لائٹس کا استعمال کریں، تیز رفتاری سے گریز کریں اور اگلی گاڑی سے مناسب فاصلہ معمول سے زیادہ رکھیں۔
بغیر ڈرائیونگ لائسنس گاڑی اور موٹر سائیکل چلانے والوں کو کیا سزا دی جائے گی؟
ترجمان موٹروے پولیس نے کہا کہ سفر شروع کرنے سے پہلے موٹروے پولیس ہیلپ لائن 130 یا نیشنل ہائی ویز اینڈ موٹروے پولیس کے آفیشل سوشل میڈیا اکاؤنٹ سے بھی تازہ ترین معلومات ضرور حاصل کر لیں۔
