کراچی: شہر قائد سے تعلق رکھنے والے ڈاکٹر ذوالفقار بُھٹہ کو عالمی سطح پر اعزاز سے نوازا گیا ہے۔
آغا خان یونیورسٹی کے ڈاکٹر ذوالفقار احمد بھٹہ، جو زچگی اور بچوں کی صحت کے حوالے سے ایک عالمی رہنما ہیں، کو کینیڈا کے سب سے بڑے شہری اعزازات میں سے ایک ’آرڈر آف کینیڈا‘ کے آفیسر کے طور پر مقرر کیا گیا ہے۔
یہ اعزاز ڈاکٹر بھٹہ کی عالمی صحت میں غیر معمولی خدمات (خاص طور پر جنوبی ایشیا، افریقہ، اور دیگر پس ماندہ علاقوں میں) پر دیا گیا ہے۔ڈاکٹر بھُٹہ کی انقلابی تحقیق نے دنیا بھر میں صحت عامہ کی پالیسیوں کو تبدیل کیا اور بے شمار زندگیوں کو بہتر بنایا۔ کمیونٹی ہیلتھ سسٹمز پر ان کا کام (جس میں پاکستان کا لیڈی ہیلتھ ورکر پروگرام بھی شامل ہے) فرنٹ لائن ہیلتھ ورکرز کو مضبوط بنانے کے لیے عالمی ماڈل کے طور پر جانا جاتا ہے۔
ڈاکٹر بھُٹہ نے اس اعزاز کے بارے میں بات کرتے ہوئے کہا ’’میں اس اعزاز کے لیے بے حد شکر گزار ہوں اور ان تمام شاگردوں اور ساتھیوں کا مشکور ہوں جنھوں نے سالوں تک پاکستان اور دیگر کم آمدنی والے ممالک میں خواتین اور بچوں کے چیلنجز پر میرے ساتھ کام کیا۔‘‘
ڈاکٹر ذوالفقار بھٹہ آغا خان یونیورسٹی (اے کے یو) کے انسٹیٹیوٹ آف گلوبل ہیلتھ اینڈ ڈویلپمنٹ کے بانی ڈائریکٹر ہیں، اور 2012 سے 2024 کے درمیان اس کے سینٹر آف ایکسیلینس ان ویمن اینڈ چائلڈ ہیلتھ کے بانی رہے۔ وہ ٹورنٹو کے سِک کِڈز سینٹر فار گلوبل چائلڈ ہیلتھ کے شریک ڈائریکٹر بھی ہیں۔ عالمی جرائد میں ان کے 1400 سے زائد تحقیقی مقالے شائع ہوئے۔
آغا خان یونیورسٹی کے صدر ڈاکٹر سلیمان شہاب الدین نے ڈاکٹر بھٹہ کی خدمات کو سراہتے ہوئے کہا کہ ان کی کامیابیاں ہمیں جدت کی جستجو اور عالمی صحت میں حقیقی اثر ڈالنے کی تحریک دیتی ہیں۔
