کراچی: پاکستان اسٹاک مارکیٹ میں آج کاروباری ہفتے کے پہلے دن تیزی دیکھی گئی اور کاروبار کا اختتام اچھے نمبروں پر ہوا۔
تفصیلات کے مطابق پاکستان اسٹاک ایکسچینج پر گزشتہ ہفتہ بہت بھاری گزرا، ملکی تاریخ کی سب سے بڑی مندی دیکھی گئی، ہفتہ وار رپورٹ کے مطابق 100 انڈیکس میں ہفتہ وار 4.19 فی صد گراوٹ کے ساتھ 4788 پوائنٹس کی کمی ہوئی۔
تاہم آج نئے ہفتے کا آغاز امید افزا طور پر ہوا ہے، اور کاروباری ہفتے کے پہلے دن مارکیٹ میں تیزی دیکھی گئی، 100 انڈیکس میں 1 لاکھ 12 ہزار کی حد بحال ہو گئی ہے۔ دن کے آغاز میں 100 انڈیکس نے 3200 پوائنٹس اضافے کے ساتھ ایک لاکھ 12 ہزار 713 پوائنٹس پر ٹریڈ کیا۔
کے ایس ای 100 انڈیکس میں 4 ہزار سے زائد پوائنٹس کا اضافہ ہوا، 100 انڈیکس 4411 پوائنٹس کے اضافے سے 1 لاکھ 13 ہزار 924 پوائنٹس پر بند ہوا، دن بھر مجموعی طور پر 463 کمپنیوں کے شیئرز میں کاروبار ہوا، 361 کمپنیوں کے شیئرز کی قیمتوں میں اضافہ، جب کہ 62 کے شیئرز میں کمی ہوئی۔
مارکیٹ میں 85 کروڑ 65 لاکھ سے زائد شیئرز کا لین دین ہوا، اسٹاک مارکیٹ میں 50 ارب 45 کروڑ سے زائد مالیت کے شیئرز کے سودے ہوئے، مارکیٹ کی بلند ترین سطح 114,189 جب کہ کم ترین سطح 110,891 پوائنٹس رہی۔
ماہرین کا کہنا ہے کہ گزشتہ ہفتے کریکشن کے بعد آج مسلسل دوسرے روز تیزی دیکھی جا رہی ہے، مثبت معاشی اشاریوں کی وجہ سے انویسٹرز میں بھی اعتماد دیکھا جا رہا ہے۔
گزشتہ ہفتہ وار رپورٹ کے مطابق 100 انڈیکس میں ہفتہ وار 4.19 فی صد گراوٹ کے ساتھ 4788 پوائنٹس کی کمی ہوئی، اور کاروباری ہفتے کے اختتام پر 100 انڈیکس 4788 پوائنٹس کی کمی سے 109513 پر بند ہوا تھا۔
100 انڈیکس کی ہفتہ وار بلند ترین سطح 117039 پوائنٹس ریکارڈ ہوئی، 100 انڈیکس کی ہفتہ وار کم ترین سطح 105601 پوائنٹس رہی، مارکیٹ کیپٹلائزیشن میں ہفتہ وار 629 ارب روپے کی کمی ہوئی، مارکیٹ کیپٹلائزیشن 14587 ارب روپے سے کم ہو کر 13958 ارب روپے ہو گئی۔
ماہرین کا کہنا ہے کہ گزشتہ ہفتے اسٹاک مارکیٹ میں تکنیکی درستگی دیکھی گئی، میوچل فنڈز میں فروخت کا دباؤ اور سرمایہ کاروں کی جانب سے منافع کا حصول غالب رہا، اور ٹیکس قوانین ترمیمی بِل 2024 نے حصص بازار میں غیر یقینی پیدا کی، تاہم مجموعی معاشی اعشاریے بہتر ہیں اور مارکیٹ میں لیکیوڈیٹی کی فراوانی ہے۔
