اسلام آباد: ڈی چوک احتجاج کے مقدمات میں اپوزیشن لیڈر عمر ایوب کی عبوری ضمانت میں 17 جنوری تک توسیع کردی گئی۔
اے آر وائی نیوز کے مطابق انسداد دہشتگردی عدالت کے جج ابوالحسنات ذوالقرنین نے عمرایوب کی درخواست پر سماعت کی، دوران سماعت ملزم کے وکیل سردار مصروف خان نے حاضری سے استثنیٰ کی درخواست دائر کی۔
وکیل سردار مصروف نے عدالت کو بتایا کہ اپوزیشن لیڈر نے پشاور ہائیکورٹ میں پیش ہونا ہے اس لیے حاضر نہیں ہو سکتے، عدالت نے حاضری سے استثنیٰ کی درخواست منظور کرکے سماعت 17 جنوری تک ملتوی کر دی۔
واضح رہے کہ اپوزیشن لیڈر کیخلاف تھانہ کوہسار میں 4، تھانہ نون میں 2 مقدمات درج ہیں جبکہ مار گلہ، شہزاد ٹاؤن،آبپارہ، ترنول میں بھی ایک ایک مقدمہ درج ہے۔
قبل ازیں پاکستان تحریک انصاف کے بانی اور ان کی اہلیہ بشریٰ بی بی کے خلاف 190 ملین پاؤنڈ ریفرنس کا فیصلہ مؤخر ہو گیا۔
احتساب عدالت نے 190 ملین پاؤنڈ ریفرنس کا فیصلہ مؤخر کر دیا ہے، جج ناصر جاوید رانا نے کہا کہ وہ فیصلہ لکھ رہے ہیں فیصلہ اب نئی تاریخ کو سنایا جائے گا۔
آپ کے دل نواز شریف کے ساتھ ہیں تو دماغ بھی چلائیں، خواجہ آصف
واضح رہے کہ احتساب عدالت نے 18 دسمبر کو 190 ملین پاؤنڈ ریفرنس پر فیصلہ محفوظ کیا تھا، پہلے 23 دسمبر کو 190 ملین پاؤنڈ ریفرنس کا فیصلہ سنانے کی تاریخ مقرر کی گئی تھی، تاہم اے آر وائی نیوز نے تین دن پہلے فیصلہ مؤخر ہونے کی خبر دی تھی۔
