اسلام آباد: پی ٹی آئی رہنما اور قومی اسمبلی میں اپوزیشن لیڈر عمر ایوب کا کہنا ہے کہ کالعدم ٹی ٹی پی سے مذاکرات پر قمر باجوہ نے کہا تھا کہ ہر مسئلے کا حل مذاکرات ہیں۔
اے آر وائی نیوز کے مطابق پی ٹی آئی رہما عمر ایوب کا کہنا ہے کہ نیشنل سیکیورٹی کمیٹی میں قمر باجوہ نے مذاکرات کا کہا تھا یہ پی ٹی آئی کا فیصلہ نہیں تھا۔
انہوں نے کہا کہ 550 ارب روپے کا پیٹرول اسمگل ہوکر آتا ہے تو اس کا ذمہ دار کون ہے، وفاقی حکومت نے اب تک 1500 ارب روپے ادا نہیں کیے، پنجاب خسارے میں ہے، خیبرپختونخوا سرپلس دکھا رہا ہے۔
عمر ایوب کا کہنا ہے کہ اس وقت ملک میں غیریقینی صورتحال ہے، سیاسی استحکام سے معاشی استحکام جڑا ہوا ہے، تحریک انصاف کے دور میں امن تھا۔
دوسری جانب پی ٹی آئی رہنما اسد قیصر کا کہنا ہے کہ پڑوسی ملک سے حالات کشیدہ ہوں گے تو دہشت گردی بڑھے گی، کسی کو اجازت نہیں دیتے کہ وہ ہمارے ملک میں مداخلت کرے۔
اسد قیصر نے کہا کہ امن کے لیے ایک دوسرے کا ساتھ دینا چاہیے، ہمارے دور میں پاک افغان ٹریڈ ہوئی، چاہتا ہوں امن کو فروغ دیا جائے۔
اپنے بیان میں انہوں نے یہ بھی کہا کہ سب سے بڑی سیاسی پارٹی کو دیوار سے لگایا جا رہا ہے۔
گزشتہ روز اے آر وائی نیوز کے پروگرام ’سوال یہ ہے‘ میں اسد قیصر کا کہنا تھا کہ عمران خان سب کو معاف کرنے کو تیار ہیں، ہر معاملے کیلیے ایک ٹائم فریم ہونا چاہیے، حکومت کے سامنے مطالبات تحریری رکھیں گے اور پھر ردعمل دیکھیں گے کہ حکومت کتنی سنجیدہ ہے۔
